2016 最後一擊

2016 最後一擊之羊腩煲！ 正！ 雖然買左急凍黑羊腩，但係清真處理，肉味好好，出而食煲羊腩平極都兩舊幾水，得幾舊肉食，湯又水流流咁！ 自己整係要時間嘅，不過夠晒料，老公已經話唔會再係出面食羊腩煲啦！哈哈！

Boxing day

聖誕最後一餐, 唔攪咁大啦, 簡單得嚟亦不失大體!

菠菜焗釀磨菇

 

 意式焗雜菜

白酒煮聖子 

繼續白松露焗雞 

Christmas cake - Strawberry Roll

2016 聖誕就此結束了!

Wishing you Merry Christmas and Happy New Year!

 

又到聖誕! 又到聖誕!





每年24號, 我地班老友記例必出嚟一聚, 我就自然忙於平安夜餐單啦.

年紀大左, 又想精彩, 又想快靚正, 哈哈, 邊有咁爽呀! 今年老友記去完日本, 專程由北海道帶左長腳蟹番嚟, 睇吓張相, 幾吸引!

呢餐簡直大滿足!

青油牛油焗扇貝 

花竹蝦伴山葵青檸醬汁 

酥炸魷魚卷 

白松露香草焗雞 





已經飽到食唔到嘅油甘魚鮫







 

 

可愛聖誕老人蛋糕 - 黑森林

仲有玻璃cookies 送比小朋友

以下......只係飲左2枝咋

香檳

鮮百合粉絲排骨南瓜盅

原來買個日本南瓜好貴架，呢個2斤半南瓜，要95蚊啊。。。。。

不過開左蓋，的確好香南瓜味。跟足呢個食譜做，不過我用鑊蒸，時間都蒸多左，因為排骨係南瓜裡面好難熟，最好排骨先蒸到剛剛熟，再倒入南瓜再蒸多一陣就好。

參考食譜

http://oniyomeryori.blogspot.hk/2016/08/miele.html?m=1

邪惡。。。。

早兩晚都出左街食飯，十分難食。。。有d失落感！ 今晚都要自己出手，買左隻爆膏蟹，佢話係澳門蟹，用上糯米，荷葉蒸，糯米仲加入冬菇及乾瑤柱。d 膏好爆，雖然好邪惡，但真係人間美食啊！

唉。。。真係懶d都唔得！

姪孫生日會

Mo 媽一早問定我, 可否幫呀mo B 整個生日蛋糕，帶番學校開派對，由於番工日子，我都未能整得太精彩, 只好簡簡單單。。。。雖然未係整到我想要嘅design, 但好采都唔太失禮。

最後, 個蛋糕似乎吸引d呀媽多過d同學仔，哈哈！

壽宴

一年一度老公壽宴又嚟啦，朋友們愛係家中開派對，今年唔整咁多野，就係出而order d 食物，起碼自己唔駛抬咁多野番屋企啦。。。但話雖如此，咪又係整餐飽，哈哈哈。。。。大家開心，無所謂啦！

四川麻辣水煮牛

手痕痕，想整水煮魚或者水煮牛好耐，結果。。。。整水煮牛肉，仲叫老公去九龍城文記買靚牛番嚟，搵埋老友上嚟試味。。。嘩，好得！都不能不讚。。。哈哈哈！

另外又見到琵琶蝦，蒜蓉蒸配糯米飯底，掂！加埋哥仔留比我嘅靚海班，好少有嘅石蟹，仲有鮮百合燉木瓜，食完d重口味，嚟個濕潤甜品確實不得了！

又嚟蟹啦

朋友係泰國買左隻蟹醬比我試，咁啱今日有隻靚肉蟹就整整佢，個汁好好味!! 下次有朋友去泰國一定要帶番嚟，另一番味道。

“泰”好味

离晚約左老朋友上嚟食飯，攪左餐泰菜 ~ 冬陰功湯，咖哩蟹伴蒜茸包，泰式鹽焗烏頭，炒雜菜，佢仲帶埋椰青上嚟，絕配!

一年一度。。。。。

一年容易又中秋，今年都算破左自己紀錄，整左過百個月餅，蓮蓉，五仁，班蘭，豆沙，仲有自己整嘅奶皇。我仲買左好精緻嘅禮盒做包裝，好pro 喎，哈哈！

口水雞翼

今次唔買新鮮雞，用左雞翼去做呢味口水雞，一樣咁好味! 伴埋粉皮同糖心皮蛋，襯到絕!

口水雞食譜已係早前登過，可入“中菜篇” 搜尋。

Chocolate ginger sugar

今日又玩另一隻味 ~ chocolate ginger sugar. 就咁試，d 薑味都幾出，不過焗左cookies, 反而就唔多覺，朱古力味就有。 可能下次整蛋糕，薑味易出d.

特別食材

上次老公澳洲，姑奶幫忙買左幾隻唔同味道嘅糖比我試吓，今次試呢款好得意，有d 薑味, 荳蔻同開心果就少d, 但整出嚟嘅食物味道好特別，上次整左麵包，今次試muffins, 效果幾好!

非一般的撻沙

你有幾何幾到游水撻沙?? 我成日去買海魚，都係第2次食，真係超好味，邊有得輸呀！再加埋麥片蝦，我家位老爺食到大指動!!

焗豬頸肉

同朋友訂左西班牙黑毛豬臉肉，今次再整泰式焗，好耐無整過啦，再整無得輸啦，老公一路食一路讚!!

食譜參考大少奶食譜:

材料：

豬頸肉 2~3件

醃料~

檸檬葉   半杯 (揑碎)

乾蔥碎    半杯

芫茜碎    半杯

香芧 (只要白色位) 3枝切碎

老抽        50ml

魚露        30g

米酒        1/4杯

砂糖       70g

蜜糖適量

做法:焗爐預熱200度

1)將豬頸肉洗淨抹乾，將醃料拌勻放入豬頸肉醃過夜

2)醃好豬頸肉放入焗爐將兩面燒約20分鐘，再塗上蜜糖，焗大約5分鐘燒至焦香. 放涼切件上碟.

醬汁:

青檸汁 5湯匙

魚露 2茶匙

砂糖 2湯匙

蒜蓉半茶匙

檸檬葉2片切幼絲

乾蔥頭1粒切細粒

將所有材料攪拌成醬汁

不是期望中.......

离晚整左 蘇格蘭長毛高地牛 (Highland Cattle) 西冷卷 (Striploin Roll)。 無脂肪，重肉味，但個人就鍾情澳洲肉眼多D.

至於枝酒，唔識欣賞...... 味道太強，感覺好粗獷....... 唔係我口味!

以上兩樣都係店舖介紹，下次都係靠自己好D!

焗葡國雞

好耐無玩過葡國雞，今次再加埋d 椰絲係面再入焗爐焗，正!

電飯煲焗雞

係老友屋企食飯，教佢整左呢個電飯煲焗雞，快靚正，零失敗!

先買隻新鮮雞，洗淨，吊至乾身，用少許海鹽擦勻雞皮及雞腔內，醃約3小時以上。 預備大量薑片，蔥段，紅蔥頭4至5粒一開四件; 把一部份蔥段，薑片，紅蔥頭放入雞腔內. 其餘放係電飯煲底部，放上雞，洒上2至3湯匙玫瑰露係雞面，就好似平日開製煮飯一樣，直至跳製後，取出雞放涼，切件上碟，記住留番雞汁呀。

用電飯煲焗雞有個好處，時間剛剛好，雞肉滑流，保存番雞嘅香味。 用番原來雞汁同雞一齊上碟，包你食唔停!

好盡慶........

剛剛過左嘅long weekend, 玩盡中西餐!

先係7.1 約左班小學同學聚餐，雖然唔係自己屋企攪，不過.......都係我煮 ~ 冬瓜盅，蒸細鱗，麥片瀨尿蝦同埋芝士琵琶蝦，本來整埋炒飯底，但佢地又話怕飽過頭......結果全場清晒，仲有紅酒雪芭做甜品，無得輸!

7.2 仲變態，玩焗乳豬，其實好核突架......一路洗豬，感覺罪惡感好重. 雖則皮未夠脆，但肉質好嫩滑，同場加映香草焗琵琶蝦同埋麥西哥芝士素醬小食. 仲有Sangria..
...繼續紅酒雪芭!! 食得夠癲!

蝦醬蒸豬頸肉

星期六熱辣辣，去左大澳同陽光玩遊戲......真係攞命. 不過有好處係太熱，唔多人! 好好行!

當然順道去張財記買蝦醬，係街邊婆仔買蝦乾. 今晚就試用蝦醬蒸豬頸肉，好香呀！

好簡單，只要有豬頸肉，切d 薑絲，加2湯匙蝦醬，少許楜椒粉，半茶匙砂糖，少許生抽，生油，粟粉醃半小時就可以去蒸啦.