終於感覺到冬天啦，繼离日打完邊爐，今晚就玩煲仔飯 ~ 冬菇，臘味，鮮雞，熱辣辣上枱，點會唔暖泣泣呀！
學鼎爺整呢個生炒糯米飯，堅係生米炒成熟飯，玩成半粒鐘，真係炒到手仔軟，好采炒完出嚟都似模似樣。
一路炒，不其然地唸起細個，一到冬天，媽媽就一早起身炒呢個糯米飯比我地食。媽媽完全唔覺辛苦，只要大家食得開心，佢就開心！
情人節一向都唔會出去食飯，又貴，質素又差! 倒不如簡單係屋企整餐食，已經感到好幸福!
情人節快樂!
朋友幫忙係流浮山買左肥大金蠔，之前睇電視，話金蠔先蒸後煎，效果會好d, 我將金蠔係冰格攞出嚟一陣，跟手隔水蒸左8分鐘，用kitchen paper 抹乾水份，洒小小粟粉，細火煎至金黃色上碟，跟住用一湯匙薑茸炒一陣，加入適量蜜糖，煮至結身就倒係金蠔面。唔用薑蜜，用黑醋都可以的
