素湯

今日好介紹，無難度，素湯推介:

紅蘿蔔，粉葛，粟米，馬蹄，蓮藕，栗子，幾粒紅棗，一塊果皮，煲2-2.5 粒鐘，攪掂!

素湯

自從見”唔熟唔食”煲左幾次素湯，好似好吸引咁，而近期亦為自己要減磅，煲番轉飲吓都好。

材料包括紅蘿蔔，粟米，黑木耳，馬蹄，腰果，冬菇，果皮，無花果，水滾後落料，中火煲10分鐘，轉細火煲兩小時。

花生木瓜雞腳湯

老公病完到我病，d 感冒菌實在跟你糾纏不清。

都係要煲番個湯潤一潤啦。

木瓜雞脚湯
木瓜一個，雞腳6隻，半斤細肉，海底椰，無花果2粒，蜜棗3粒，花生一湯匙， 果皮2塊，南北杏適量。

1. 木瓜去皮切大件
2. 雞腳肉飛水
3. 無花果切兩件, 果皮去囊
4. 煲滾水，加入所有材料煲2小時，加鹽調味。

西洋菜豬肺湯

今日去開菜檔想買西洋菜煲個湯，咁菜檔哥哥就話煲豬肺啦，又好喎，都好耐無整過囉。

材料：
豬肺一副
（最好叫豬肉檔幫手洗埋，否則番屋企洗到傻）
南北杏
果皮
瘦肉約$15～$20
紅蘿蔔一細條
無花果3粒

做法：
1. 先將豬肺切件，開白鑊（無油）燒到有微微白煙出，就倒入豬肺炒，一路炒一路會出水，炒到d 水太多，就要連豬肺倒晒出嚟，再開鑊，再炒，起碼炒5至6次，直至豬肺完全無水出為止。

2. 西洋菜洗淨，紅蘿蔔去皮切件，瘦肉出水，無花果一開二，果皮浸軟去囊。

3. 煲滾水，將所有材料煲2個鐘就可以。

排毒冬瓜青蟹湯

啦啦啦，唔好又話我食蟹呀！

今日街市叔叔教架，呢d 海青蟹係用嚟煲冬瓜湯，有排毒作用架，咁有益，點都要煲吓啦：） 煲完d 蟹味已落晒個湯到，d 蟹都無咩味囉！但個湯好鮮甜, 老公話仲好解喝tim.

材料：青蟹，冬瓜，雪耳，排骨，果皮，無花果，薏米，黑豆，花生，煲個半鐘就飲得啦。

 

 

去濕湯

最鍾意行街市, 唔覺意學到好多野架! 好似今次咁, 菜檔哥哥教煲呢個去濕湯!

睇到下面材料啦, 加半斤排骨, 少少南北杏, 我個人鐘意加多塊果皮同3粒無花果, 煲個半鐘就OK!

苦瓜黑豆黃豆排骨湯

功用解說：清熱排毒、消降血脂、平衡血糖、抵抗老化。　主治：暗瘡、膽固醇高、糖尿。

 

材料： 苦瓜二個、黃豆黑豆各四兩、果皮, 無花果, 豬排骨半斤、食鹽適量。 　

 

做法：

1）洗乾淨豬排骨，過滾水5分鐘，撈起待用。

2）洗淨黑豆黃豆，用水浸15分鐘，撈起待用。

3)   洗淨苦瓜, 果皮，去瓤去核，用清水洗過。

4)   將所有材料擺入湯煲內，取適量清水，慢火煲個半鐘。

5)   後加適量食鹽，便可飲用。