五行湯

好想同大家分享呢個五行湯，好清甜。
五行湯可以增強身體免疫能力, 有癌症病人都會煲嚟飲，只係唔落肉。呢個湯就算日日飲，都唔會怕涼。

材料
五行包括 :
白蘿蔔苗及蘿蔔葉
粟米
紅蘿蔔
鮮牛蒡

瘦肉 或 西施骨

蜜棗 或 乾蕪花果

果皮

我自己做法:

由於菜湯唔需要煲太耐，但唔夠時間，骨類又出唔到味，我會先用西施骨煲1.5 小時，跟住再加入五行材料，蕪花果及果皮，煲1.5小時，熄火調味就可以飲用。

家常便飯

外甥仔聽日番澳洲，難得一聚，整餐好小小嘅家常便飯，大家傾吓，食吓，不之幾高興。

外甥仔一見到冬瓜盅，即問點解唔係冬天食咩？。。。。唉，呢d咪叫做鬼仔囉! 冬瓜冬天食，哈哈!

呢晚嘅亮點，當然係迷里冬瓜盅啦，可愛到呢。。。。

好耐都無整過泰式豬頸肉，仍然好好味!

今次蒸帶子粉絲，打破傳統，用蒜茸，冬陰功醬，少許雞湯，水， 煮粉絲先，放涼後，帶子一開二，放粉絲面蒸3分鐘就攪掂，幾得吓喎!

話梅醉雞翼

天氣熱辣辣，凍食自然最受歡迎，用小小時間，整盒醉雞翼，放入雪櫃，幾時攞出嚟食都咁開心!

材料:
雞翼1至2磅
大量冰塊
月桂葉幾片
白楜椒粒一茶匙
蔥段(白色部份)幾段

汁料: (以下份量可因個人喜好而加減)

糟鹵 一支 (約500ml)

紹興酒 180ml

豉油雞汁 1湯匙 

雞湯或水3湯匙
魚露半湯匙
砂糖/黃糖半茶匙

話梅 6，7粒

杞子15-20粒  (洗淨用暖水浸軟)

 
做法:

開一鍋水，水滾後落月桂葉，白楜椒粒，蔥段雞翼，上鑊蓋直至水再次滾起，熄火，焗15分鐘，再開大火，再將水滾起多一次，再熄火，焗15分鐘，預備大量冰水，將雞翼放入冰水浸約10至15分鐘，隔水備用

將糟鹵，紹興酒，雞湯，豉油雞汁，杞子，話梅，魚露全部倒在一個碗內浸約10分鐘試味.

將雞翼放入汁料內，入雪櫃浸一晚就可以吃用

口水雞

今日心血來潮，想食口水雞，仲玩手撕果隻，不過今次雪得唔夠，下次雪凍d就更正。

食譜: 

http://rebekitchen.blogspot.hk/2015/11/blog-post.html

玩新野

呢2日整左唔同餸，都用煎米粉做底! 离日整薑蔥大蝦，d汁混埋d脆米粉，好好味! 今日就整冬陰功煮雞，好好味，不過d汁唔太配合煎米粉，配飯應該比較適合。

邪惡的。。。。。

天氣凍，突然好想食煲仔飯，反正上日入左好多臘味。。。。。就嚟呢煲邪惡煲仔飯啦！有臘腸，潤腸同臘鴨肶，仲唔邪惡。。。。哈哈哈!

糯米飯

天氣凍，突然好想食糯米飯，用埋上次係上海街買嘅臘腸，太美好了!

好選擇!

天氣凍凍地，你會食咩? 打邊爐? 羊腩煲? 或者整番個雞煲亦是好選擇! 唔難整，仲可以買d豆苗，枝竹一齊食，簡直滋味啦！順便蒸碟靚馬友，點可以唔滿足呢！

Last gathering in 2017

係2017 與好友最後一次開心派對，懶懶地，簡單幾味，志在食得開心，傾得高興!

佢地有食神，蝴蝶蛑唔係次次街市都有得賣，今次仲好肥好大隻； 另外果2隻爆膏野生膏蟹，真係貴得有道理；一年一轉嘅羊腩煲，仍然可以保持水準啦！話雖得三味餸，已飽到上腦了! 食番d生果同蛋花馬蹄露清清味蕾。

呢晚，大家都大滿足!

Happy New Year !

燒乳豬

話說呢隻急凍豬已經係冰格放左唔知幾多個世紀。。。。其實想掉左佢，老公話不如照焗左佢，睇吓點樣。當然，佢講得輕鬆啦，中間幾多步驟咪又係我整!

攪完一輪，終於出爐啦，今次係第2次焗豬，皮真係比上次脆，因為今次焗法有小小唔同，皮面搽左白醋同牛油，而焗爐溫度都提升左，出嚟效果都好好。

咸魚雞粒蒸飯

幾經辛苦，同事幫手係長洲買到條馬友梅香，因為已經係買小見小啦!

馬友咸魚，真係好味到無朋友，擦左肉連蝦乾雞肶粒蒸飯，嘩。。。。簡直係上菜!

跟呀爺學野

呀爺廚藝無得頂，大家都十分應同! 最近就跟足呀爺食譜，整左避風塘豆豉炒蟹，仲有極之懷舊嘅芝麻卷。正!

好一餐家常便飯

其實懶左好耐，加埋天氣太熱，都唔想整太多，又唔知食咩好。

但今日突然想食芝士蝦焗飯，再清清地煮個金銀蛋浸絲瓜，蒸多條班仔，雖然整完都週身汗，總好過熱辣辣出去搵食嘅。

冬瓜盅

离晚老公請左幾位老朋友上嚟食飯，整左幾味家常便飯，當然亮點就係個冬瓜盅啦，而家係街食，好少有成個冬瓜出啦，只係一份冬瓜環就算，自己整，點都真材實料啦。

四川雞煲

出街食過四川雞煲，其實搵啱材料，自己整又有何難。。。。繼羊腩煲後，四川雞煲都唔駛出街食啦!

(食譜稍後登出)

京蔥炒蟹

好耐都無玩過薑蔥炒蟹，難得買到隻堅肉蟹，炒番餐食都唔錯呀！

專登買條京蔥切件，厚薑片數片，3粒乾蔥頭一開二。 汁料 : 半湯匙麻辣醬，一湯匙蠔油，半杯雞湯，少許胡椒粉，砂糖，麻油，粟粉攪均備用。

先將蟹切件，泡油至7，8成熟，隔油備用
燒熱鑊，落油，加入乾蔥頭，薑片，京蔥炒香，加入蟹件，灒酒，上蓋焗1分鐘
加入生抽，老抽炒均，倒入已開好汁料，快炒至結身，就可以上碟。

辣椒苗

第一次接觸辣椒苗，菜檔呀哥話好去濕，又易煲，只要將葉梗較粗身去掉，只要幼嫩部份，煲滾水，加舊薑，切片瘦肉，咸蛋，煲起再加埋d辣椒苗，煮熟就起得，快靚正！

最愛酸梅鴨

原來成年有多，都無整過酸梅鴨。。。。。今晚再次回味，嘩。。。。。一流，平日我都唔加飯，今晚實在底不住，要再加飯!

梅鴨材料:
·    鴨半隻 （原隻，不用切件）

汁料:
·    薑數片(厚切), 乾蔥兩，三粒切片
·    1.5湯匙柱侯醬
·    1.5湯匙麵豉醬
.     1湯匙花生醬 （可以唔加）
·    5~6粒酸梅壓溶
·    少許生抽及老抽
·    蒜茸兩湯匙
·    冰糖適量打碎(細粒狀)

做法:
1.   清洗鴨身, 吊乾水份
2.   鴨皮用老抽上色約15分鐘
3.   燒熱鑊, 加少許油, 放入鴨煎至金黃色備用
4.   再次燒熱鑊, 加少許油, 炒薑片, 乾蔥, 蒜茸, 炒至有香味, 加入汁料略炒, 放入鴨, 灒酒, 加熱水，大火滾起後，轉細火炆大約40分鐘, 其間要把鴨轉身, 以及要試味.
5.   煮好的鴨放涼切件, 把煮剩汁料煮至結身, 淋上鴨面.

(汁料因個人喜好而可加減)

暖泣泣。。。。

終於感覺到冬天啦，繼离日打完邊爐，今晚就玩煲仔飯 ~ 冬菇，臘味，鮮雞，熱辣辣上枱，點會唔暖泣泣呀！

粒粒皆辛苦。。。。

學鼎爺整呢個生炒糯米飯，堅係生米炒成熟飯，玩成半粒鐘，真係炒到手仔軟，好采炒完出嚟都似模似樣。

一路炒，不其然地唸起細個，一到冬天，媽媽就一早起身炒呢個糯米飯比我地食。媽媽完全唔覺辛苦，只要大家食得開心，佢就開心！