胡椒蟹

大年初三，老友記一家嚟拜年，實在街市唔多野賣，玩爐端燒就最好啦，好唔覺意地，竟然買到隻大肉蟹，整左胡椒蟹，好惹味，可以係街市買到呢種肉蟹，實在可遇不可求!

爐端燒

爐端燒，唔一定要出街食，只要有朋友買個爐端燒嘅爐，係屋企一樣食得好盡興，食幾多，飲幾多都可以！

又嚟蟹啦

朋友係泰國買左隻蟹醬比我試，咁啱今日有隻靚肉蟹就整整佢，個汁好好味!! 下次有朋友去泰國一定要帶番嚟，另一番味道。

“泰”好味

离晚約左老朋友上嚟食飯，攪左餐泰菜 ~ 冬陰功湯，咖哩蟹伴蒜茸包，泰式鹽焗烏頭，炒雜菜，佢仲帶埋椰青上嚟，絕配!

焗豬頸肉

同朋友訂左西班牙黑毛豬臉肉，今次再整泰式焗，好耐無整過啦，再整無得輸啦，老公一路食一路讚!!

食譜參考大少奶食譜:

材料：

豬頸肉 2~3件

醃料~

檸檬葉   半杯 (揑碎)

乾蔥碎    半杯

芫茜碎    半杯

香芧 (只要白色位) 3枝切碎

老抽        50ml

魚露        30g

米酒        1/4杯

砂糖       70g

蜜糖適量

做法:焗爐預熱200度

1)將豬頸肉洗淨抹乾，將醃料拌勻放入豬頸肉醃過夜

2)醃好豬頸肉放入焗爐將兩面燒約20分鐘，再塗上蜜糖，焗大約5分鐘燒至焦香. 放涼切件上碟.

醬汁:

青檸汁 5湯匙

魚露 2茶匙

砂糖 2湯匙

蒜蓉半茶匙

檸檬葉2片切幼絲

乾蔥頭1粒切細粒

將所有材料攪拌成醬汁

焗葡國雞

好耐無玩過葡國雞，今次再加埋d 椰絲係面再入焗爐焗，正!

海南雞飯

託朋友係星加坡帶左d 香料包番嚟，其中一樣係海南雞飯醬.

做法好簡單，只要洗好米，加2，3粒蒜頭，2枝香芧(只要白色部份同拍扁)，買到嘅就加一枝班蘭葉，倒入海南雞醬，加埋適量嘅水，如果有就加d 黃薑粉，用電飯煲煲熟就可以. 中間時間，打開蓋打均d 飯就更好.

至於隻雞，洗乾淨雞抹乾水份，雞肚放入蔥段，班蘭葉，香芧，紅蔥頭. 我用慢煮方法 70°C 2小時，跟住搵冰水浸至凍身，切件上碟。 今次貪玩起埋骨，效果當然一流啦。

辣得夠滋味

上日有朋係星加坡帶左包黑楜椒蟹醬比我，今日就買左隻大肉蟹試吓味!

味道好好，如果黑楜椒味再重d就更好，但夠晒辣，十分野味! 老公仲話要留番d 汁嚟撈麵，笑死! 下次會加入d 黑楜椒粒爆香後，先再加醬! 咁就無得頂啦!

同場加映“香茜蒜茸炒蜆” 同 “蒸燕班”。

香茜蒜茸炒蜆好籍單，只要3湯匙蒜茸及莞茜一齊炒就可以。

印度菜

上年老公送左本Jamie`s cooking book 比我，因為佢面嘅食譜有d 複雜，一路都未有動力去試整. 直至老友問，幾時整餐Jamie`s 菜食吓............我睇完又睇，結果選左呢度菜 ~ Chicken Tikka Masala.

要買好多香料粉，搵左幾轉先買齊. 本來係超市已買左Nan Bread, 點知我呢位朋友出開街，竟然買晒整Pilau Rice 材料上嚟，跟住食譜整.......結果，好完美嘅印度餐出場，好得吓!

濃味過後，食番個好清新嘅 Lemon Parfait 清清味蕾，prefect! 呢對水晶杯係朋友係日本帶比我嘅手信，咁襯法好靚啊!

Pilau Rice Recipe:

http://www.goodtoknow.co.uk/recipes/537942/pilau-rice

 

香草

朋友仔係南非自家花園, 摘左好多Rosemary 及香芧帶番香港送比我地，非常新鮮。無理由唔攪攪佢嘅!  買左隻新鮮雞整香草焗雞, 用香芧整個冬蔭功湯, 正晒!

香草焗雞 

材料:

1. 雞 (約2斤多D)
2. 海鹽, 牛油, 黑楜椒適量
3. 紅蔥頭,  蒜頭各2粒切茸
4. Rosemary適量切碎
5. 半個檸檬 

做法:

1. 雞洗淨吊乾
2. 將材料(2-4) 混合, 搽均雞裡裡外外, 最好留d放入雞皮與雞肉之間更入味
3. 加入半個檸檬放入雞肚, 醃足一晚
4. 第二日由雪櫃攞出放係室溫半小時以上, 先預熱焗爐200度, 焗35分鐘 (視乎雞大小再加減時間). 焗好熄火, 等多幾分鐘先攞隻雞出嚟, 放涼就可以切件上碟. 

** 焗果時香味香到屋外走廊都聞到!

冬蔭功湯 (3人份量)

材料:

1. 中蝦6隻 : 去頭挑腸
2. 細蝦約半斤 : 去殼, 蝦肉留番煮其他餸
3. 香芧3-4枝 : 只要上半身白色部份, 略略拍扁, 斜切細段
4. 南薑幾片
5. 莞茜莖 3-4 棵
6. 紅蔥頭2粒 : 一開四
7. 原隻紅辣椒仔3-4隻 : 可以牙籤係椒身”吉”幾吓, 出味d
8. 蕃茄1個 :  一開四, 去子
9. 檸檬葉幾片: 用手斯開
10. 鮮草菇 幾粒 :  出水, 一開二
11. 冬蔭功醬 2湯匙
12. 魚露1湯匙
13. 青檸汁約2-3湯匙 

(以上材料都可視乎個人口味而加減)

做法:

1. 先開鑊加少許油, 炒香細蝦殼, 加適量水份, 中細火煮30分鐘. 隔走蝦殼, 蝦水留用.
2. 將材料(3-7) 炒香, 加入蝦湯, 細火煮約15分鐘
3. 加入材料(8-11) 以及中蝦蝦頭, 煮幾分鐘, 再放入蝦肉, 煮滾
4.  加入魚露, 青檸汁 及少許鹽, 糖, 調好味就可以熄火 

** 亦有食譜喜歡加入椰汁或淡奶, 這就個人喜好

麥片蝦

呀嫂去完星加坡，買左包整蝦嘅麥片比我試下。

做法好簡單:

先將蝦洗淨，挑腸，中間開一刀，印乾加少許粟粉去炮油。

中細火開鑊，加入牛油，乾蔥茸炒香，加入2隻子天椒，1湯匙咖哩醬略炒，倒入蝦，加少許海鹽，黑楜椒碎炒均，倒入麥片，熄火炒均就可以上碟。

如果你地去開星加坡，呢樣都係唔錯嘅手信啊!

Sous Vide ~ 滑雞

買左隻新鮮雞，去頭去頸去腳，入袋真空後，65°c 5小時，滑到無朋友! 再伴自己調嘅泰式汁，盡在不言中.

泰汁材料:
白醋，子天椒粒，砂糖，魚露，蒜茸，青檸汁，少許檸檬葉

把材料調至自己啱味道就可以啦.

咖哩蟹

感謝朋友嘅安排，上日可以跟一位泰國廚學整咖哩蟹，冬陰功湯同泰式海南雞飯。

到自己點都要整番轉嘅，先整咖哩蟹先，做法同我平時有唔同，用嘅咖哩粉係巴基斯坦出嘅，都幾香架👍. 

只可惜前日係印度店買左包薄餅，唸住送咖哩，超唔得，激死! 早知都係自己整蒜茸包啦!

學泰菜

朋友好介紹，搵左個煮泰菜的老師上門教整泰菜，老師其實係泰菜館到做廚，不過朋友去佢間鋪食到好熟，所以搵佢上嚟教下路.

离日教整左3樣餸
咖哩蟹
冬陰功湯
海南雞飯

唔教真係唔知，有d 步驟，材料，之前係唔知嘅. 例如巴基斯坦咖啡粉同泰國咖啡粉係唔同，前者配花奶煮，後者配椰汁煮，前者會薄身d, 後者會結身d.

除夕夜

除夕夜搵嚟老友兩公婆一齊倒數，唸住簡單d, 整個日式火煱，用左老友係日本帶來手信，昆布及鰹魚絲，再去Citysuper 買左日本蘿蔔同京蔥，個湯底甜到無朋友. 雖然食得好飽. 都要食番個心太軟做結尾.

完美的結束，亦是美麗的開始!

Happy New Year!

鹽麴 + 醬油麴

“鹽麴” & “醬油麴” 已經興爆日本，香港雖然都有得賣，不過細細樽都好貴. 而家試下自己整，睇下成唔成功先...... 8-10日後就知啦!

咖哩蟹

今日係西貢買左3隻青蟹，番嚟緊係整我最愛嘅咖哩蟹啦，配個法包，無得頂!👍

泰式醉鮑魚

真係唔知道, 上水太湖虛街市D 野原來都好平, $5 一份有3大個節瓜, $7一份有幾個薯仔蕃茄.... 等等.  但比我搵到一檔, $108 有8大隻活鮑魚, 好底, 點都要買嚟試吓, 又係另一檔$40 買左半斤急凍中白蝦.  用嚟整醉鮑魚, 蝦就最好不過啦! 

 

整左出嚟, 鮑魚好得, 蝦就一般啦, 唔新鮮!

 

 

食譜:

1. 鮮鮑魚 / 其他海鮮
2. 糟滷 350G
3. 雞湯 300G
4. 清水50G
5. 香茅, 拍扁, 切條 (只要白色部份) 35G
6. 南薑, 切片 35G
7. 指天椒, 一開二  3-5隻
8. 檸檬葉 8G
9. 砂糖 2湯匙
10. 玫瑰露 OR 花雕 3湯匙

 

做法:

1. 將材料(2) - (9) 大火煮滾後, 轉細火煲5分鐘, 熄火, 待涼
2. 開一煲水保持至約大約80度, 將鮑魚煮熟
3. 倒起鮑魚, 去殼, 去腸, 放入冰水浸約10分鐘
4. 隔乾水, 就放入糟滷汁中, 加入玫瑰露或花雕, 放入雪櫃雪6小時以上就可以享用.

** 因各人口味唔同, 當煮糟滷汁時, 要一路煮, 一路調啱自己味道. 食完海鮮, 個汁可以留番整醉雞翼, 都好好味.

 

 

 

 

冬陰功海鮮南瓜湯

上星期睇"唔熟唔食"，見Jacky 教整呢個海鮮南瓜冬陰功湯，好似好好味咁，今晚自己又整番轉，嘩。。。真係好好味! 估唔到加左藩茄同南瓜嘅冬陰功可以咁出色，正!

冷麵

上日去AEON, 朋友介紹左隻鰹魚汁，加埋柚子醋，去整冷麵汁。我用左一份鰹魚汁，1/3 份清水，少許柚子醋，少許麻醬，整出嚟個汁好好味，當然要一路調，一路試味啦，調到啱自己口味就可以。