粒粒皆辛苦。。。。

學鼎爺整呢個生炒糯米飯，堅係生米炒成熟飯，玩成半粒鐘，真係炒到手仔軟，好采炒完出嚟都似模似樣。

一路炒，不其然地唸起細個，一到冬天，媽媽就一早起身炒呢個糯米飯比我地食。媽媽完全唔覺辛苦，只要大家食得開心，佢就開心！

簡單 。幸福

情人節一向都唔會出去食飯，又貴，質素又差! 倒不如簡單係屋企整餐食，已經感到好幸福!

情人節快樂!

薑蜜煎金蠔

朋友幫忙係流浮山買左肥大金蠔，之前睇電視，話金蠔先蒸後煎，效果會好d, 我將金蠔係冰格攞出嚟一陣，跟手隔水蒸左8分鐘，用kitchen paper 抹乾水份，洒小小粟粉，細火煎至金黃色上碟，跟住用一湯匙薑茸炒一陣，加入適量蜜糖，煮至結身就倒係金蠔面。唔用薑蜜，用黑醋都可以的

簡單團年飯

今年同家人提早做左節，所以今日得倆公婆自己食。 明知街市又多人，又貴，都係打開雪櫃，有咩食咩啦！澳洲M7和牛肉眼，唔失禮啦，再玩fusion d, 團年食埋碗湯圓，正到不得了！

最後一糕 ~ 芋頭糕

一早起身整埋呢4底芋頭糕，就可以收爐啦！

祝大家雞年行好運！步步高昇！身體健康！

雞年再見！

糕。糕。糕。。。馬蹄糕

今日公司收爐啦，原本唸住聽日放假先再蒸糕，但手痕痕，想即晚整一部份，聽日就可以休閒d.

今晚先嚟2底蘿蔔糕，2底馬蹄糕，聽日玩埋芋頭糕，就真係收爐啦！

糕。糕。糕。。。。蘿蔔糕

又係整糕日子，第一轉先嚟蘿蔔糕，10斤蘿蔔，去頭去尾去皮，都係8斤到，整左8底，今年d蘿蔔好鬼靚，好多水。7底都攞晒番娘家比佢地分，自己剩番一小底，好采年三十唔駛番，要再整多轉比自己。