Happy New Year 2014!

Happy New Year!

祝願大家心想事成，幸福快樂!

送上“法式朱古力布丁”，希望大家每天與身邊人甜甜蜜蜜。

Happy Christmas Eve Dinner

Merry Christmas!

我地每年，都同班老友記開party, 有大食大!

睇吓今年個double deck seafood platter, 都已經好震撼，加埋個萬古燒，絕!

當然少不免有我嘅小甜點同christmas cake 啦，今年因為有枝正酒，要配cheese 最好不過，Hazelnut blueburry cheese cake 就成為全場嘅終結篇。

American Cheese Cake

12月最後一個order, American Cheese Cake.

做cheese cake 我唔太鍾意放得太多裝飾，簡簡單單，都有它的美!

Strawberry Mousse Cake

再嚟細路仔蛋糕 - Strawberry Mousse Cake !

又確實我無咩經驗整細路蛋糕，一心唸住好多顏色，望落去好開心就ok. 再買多兩隻公仔放上去 。。。。 啦，差唔多啦!

超潤湯水

老公d 咳一路都未好，煲番個潤d 湯水，潤一潤啦。

材料：
鮮海底椰一包，一開四
紅蘿蔔一隻，去皮切件
合掌瓜2隻，留皮，去芯，切大件
粟米一條，切件
瘦肉半斤，飛水
果皮兩塊，浸軟，去囊
無花果3粒，一開二
雪耳適量，浸軟，切件
南北杏，沙芯，海竹適量

將所有材料滾水落，煲2小時。

同場加映煎紅衫魚仔，魚檔哥哥話唔係平時食果種架，又真喎，魚味係濃d 架喎，好好食。

大門鱔

昨日魚檔哥哥話番左好多大門鱔，可以試吓，老公話呢d 大門鱔係深水魚，少有。

去到檔口，魚檔哥哥即場開條三十幾斤門鱔，切左中間最肥美部份比我地，隔離位嬸嬸仲教我，用幾片薑，蒜頭，煲淋左d 蘿蔔，先放魚，塘芹，一熟就熄火。所以話呢，行街市，會收到好多料架！

Fresh fruit and cream sponge cake

呢個蛋糕，係位同事訂比佢對孖仔1歲生日。起初都有d 壓力，未做過細路仔蛋糕，仲係1歲，咁緊要日子，點都唔可以失禮！

雖然做嘅期間，都發生左以外，不過。。。最後都大功告成，亦感恩，佢地各人都好欣賞，多謝！

潤一潤先！

天氣太乾燥啦，令到喉嚨都唔係太舒服，整番個“無花果雪耳燉雪梨”，飲完後，即時潤晒！

材料：2人份量

雪梨2個 ～ 留皮去芯

無花果3粒，切開兩件

一茶匙南北杏

雪耳3～4棵（細） ～ 浸軟，切去中間硬位

果皮一塊 ～ 浸軟去囊

冰糖適量

做法：

把所有材料放入燉樽，加入適量熱水，燉1小時，之後開蓋，加入少許冰糖，再燉15分鐘就完成。

 

 

 

老友記同老公賀壽

一班老友記同老公慶生日，去左一間都出名嘅西班牙餐廳 ～ Catalunya。個場好靚，坐得都幾舒服。至於食物，就一D D 好食啦!  我最欣賞係Sangria, 酒味濃，比起澳門飲嘅更好味！

但最出乎意料嘅係，有朋友着左件Barcelona 嘅波衫嚟，成晚有好幾個老外走嚟讚佢，“very nice T shirt”!  廳餐經理仲攞左佢地有件簽晒名嘅波衫比佢睇！ 比起着晒西裝d 友，我老友，紅足全場！

今晚，老公啦老友記，過左個好開心嘅生日！
 

多謝大家！

 

Birthday Cake & macarons

呢個birthday cake 係送比老公嘅，由開始想點design 個cake 到而家final, 已經唔同晒樣，不過不失啦！都仲未做到我想嘅樣！！
 

蛋糕由脆脆餅乾底+杏仁蛋糕+法式芝士+熱帶風情果蓉（菠蘿，青檸，芒果，椰子rum + 椰汁）組成。都整得幾辛苦吓。。。。

 

老公，生日快樂啊！
 

Macarons 係小朋友至愛，Jayden 小朋友生日，就整盒送比佢，希望佢鐘意啦！實在好耐都無整過，好采都唔算太樣衰 ：）

Happy Birthday Jayden!

 

Green Grape in White Wine Jelly

今日老公生日， 仲突登攞埋假陪佢，本來安排左節目，訂埋枱食飯，不過。。。某d 原因，今日嘅。。。。。並不是我schedule 之中。。。。只剩番呢兩杯白酒啫哩。

 

 

老公, 生日快樂啦！

 

 

臘味糯米飯

同事介紹，美心有整糯米飯套裝賣，唔駛呢處買d 果處買d 咁煩。可以跟足食譜做，零失敗。

睇，正嗎？

感性的一晚 ～ 7枝酒！

我地嘅習慣，買到好野，就即慶搵朋友一齊分享！

今轉都唔例外，係西貢買左蟹同蝦，即call 老友記一齊分享！ 即使佢一家4口，病左3口，都無問題！

食吓，傾吓，順道慶埋佢地結婚7週年紀念！ 大家越傾越感性，有笑，有喊！傾到已經零晨4點啦，飲左7枝酒！係咪好癲呢？

但。。。。對我嚟講，我享受！

早晨

通常係週末，悠悠閒嘅早上，兩條友都鍾意去西貢逛一逛，食番個早餐，嘆一嘆！

週日晚餐@菜乾豬骨粥 + 炒麵

离晚食得太多啦，今晚清清地，煲番個靚粥，炒個麵！ 滿足了！

無花果撻

整呢個撻唔難，但要整個撻皮靚，都有點考功夫。我最初跟原稿整，整左2次，個撻皮都唔得，跟住搵另外一個食譜整，都整左2次，終於靚仔！

不過呢個撻要即日食先好，因為無花果切開左，放到第2日已經無咁靚，撻皮陣左夜都無咁脆口。

預壽

難得家姐离晚係澳洲番嚟探親，就順道啦老公預早賀壽。大家真係無嘜幾可一齊切蛋糕。

Menu :

西洋菜羅漢果煲豬肺
香煎大蝦
電飯煲焗雞
椒鹽鮑魚仔伴黑木耳
薑蔥炒蟹
蒸海魚 （無映）
焯菜 （無映）
無花果撻