恭喜發財

恭喜發財，祝大家步步高陞，馬年行大運，最緊要係身體健康，日日笑口常開!

今早唔知仲咩，大年初一打爛左2樣野，唉。。。。唯有講句，落地開花，富貴榮華啦！

今年除左整蘿蔔糕，仲有苧頭糕。薑汁年糕唔知點解，整左幾轉，都整唔番上年味道，本來想放棄，但總心心不憤，今早再整。。。哈哈哈，呢轉終於似樣啦!

花開富貴

農曆新年又到啦，屋企d 花等唔到過年，已經開得好大好靚。

祝願大家花開富貴，馬年行大運，心想事成，身體健康 !

恭喜發財 !

蒸，蒸，蒸。。。。。蘿蔔糕

今年星期五係初一，要蒸糕都係時候啦，早幾日想整番上年嘅薑汁年糕，但整極都做唔番上年嘅味道。。。。。。停一停先!

所以先起3底蘿蔔糕比朋友先，年29同30 再整比屋企人。

豪番餐

离日與老友記團年，去左間叫藍鯨水產食日本野，全程食物係幾好嘅，服務態度都十分好，可惜，有兩樣野要即場扣分，第一，食日本野，起碼都比杯綠茶或者玄米茶飲吓，比杯清水又差d, 點知老闆話係綠茶，吓。。。。飲唔出囉，開到咁唏。。。。。第二，甜品竟然得大菜糕! 格格不入! 幸好師傅都有心機整每度菜，service 又好，令到大家都食得舒服。

Weekend dinner

今日買左d 好新鮮嘅魷魚，瀨尿蝦，紅立魚。

魚當然清蒸啦，鮮魷，瀨尿蝦乾煎，加上檸檬汁同椒鹽，簡單又好味，炒多個九菜花，正！

整臘腸

上星期六，跟表妹出去學整臘腸，都得意嘅，步驟唔難，上堂老師仲比我地試左味。。。。我都會繼續係出面買囉！哈！

整完臘腸，因為無風乾機，番屋企用焗爐開95度風乾12小時架，睇吓下面張相。

不過可以用同樣方法去整其他腸，如雞肉腸等，整完唔駛風乾，直接落鑊煎，鬼老都係咁做啦，應該幾好，下次試試先。

Weekend dinner

外甥仔鍾意食西餐，今晚就簡簡單單整幾味啦。

煙三文魚沙律
焗豬肋骨伴薯茸
清酒煮蜆
牛油焗扇貝

清酒煮蜆:

材料 - 蜆一斤(先出水，半開已可以)， 清酒一小枝，雞湯半杯，牛油一湯匙，薑絲+蒜片小量

1) 開熱鑊，放入牛油，薑絲，蒜片炒香

2) 加入蜆炒幾炒，加入半枝酒，雞湯，煮滾後，再加入剩餘半枝酒，再滾起就熄火，加少許鹽，砂糖就完成。

牛油焗扇貝:

只要把扇貝洗淨，加入小片牛油，海鹽，蕃茜，放入已預熱220度焗爐，焗5分鐘。