栗子冬菇炆雞翼

而家d 栗子好靚，好甜，离晚炆完d 鷄翼仲好味啊！

週日之家常便飯

 

幾時食都咁好味嘅 “酸梅鴨” （我覺得啫），整多碟清清地嘅 “清炒露荀黑木耳”！Like!

 

 

 

 

 

酸梅鴨材料:

 

·    鴨半隻

·    薑數片(厚切), 乾蔥兩粒切片

 

汁料:

·    1.5湯匙柱侯醬

·    1.5湯匙麵豉醬

·    5粒酸梅去核壓溶

·    少許生抽及老抽

·    蒜茸兩湯匙

·    冰糖適量打碎(細粒狀)

 

做法:

1.   清洗鴨身, 吊乾水份

2.   鴨皮用老抽上色約15分鐘

3.   燒熱鑊, 加少許油, 放入鴨煎至金黃色備用

4.   再次燒熱鑊, 加少許油, 炒薑片, 乾蔥, 蒜茸, 炒至有香味, 加入汁料, 放入鴨, 灒酒, 加水, 炆大約40分鐘, 其間要把鴨轉身, 以及要試味.

5.   煮好的鴨放涼切件, 把煮剩汁料煮至結身, 淋上鴨面.

 

(汁料因個人喜好而可加減)

 

 

星期五之大閘蟹

今日老公買左大閘蟹番嚟，仲醒嘅係有埋加飯酒，兼有話梅，一流啦！

大澳特產

去左大澳行左一轉，天氣好好，又唔多人，幾好行。

係大澳買左蝦醬，臨走之前，仲係海鮮檔買左超大隻海蝦，攞番屋企煮！

睇，蝦醬蝦乾炒飯，加埋個白焯巨蝦，超鮮甜，又爽口，比得起西貢嘅油蝦，無得頂！！

煎蠔餅

老公放假，係街市買左d 好靚嘅蠔仔番嚟，咁就可以試整餐“煎蠔餅”啦！好味道。

材料：
半斤蠔仔
蔥，莞茜適量，切碎
蒜泥 1 茶匙
雞蛋3隻
木薯粉3湯匙 + 水5湯匙攪均

做法：
1. 蠔仔用粟粉清洗，煲一小煲滾水，息火，加入已洗淨蠔仔，10秒到就倒番出嚟，隔水備用

2. 打均雞蛋，加入蔥粒，莞茜粒，蒜泥，加少許鹽，楜椒粉，麻油，少許砂糖攪拌。

3. 蛋槳加入木薯粉水，蠔仔，就可以落鑊用中細火煎至金黃面。

＊蠔餅要配靚嘅魚露一齊食，令啥唔同。

是日晚餐精選

明明話食清d 啦，哼，喂食都係無計！

清蒸海魚仔 ～ 5條都唔同架，不過咩名。。唔記得囉
蒸蟹砵
清酒煮大硯

都算清啦！

茼蒿菜炒豆豉鯪魚

原來，當你果日唸唔到煮咩餸，又要快靚正，就嚟個“茼蒿菜炒豆豉鯪魚”， 正！當然，記住要倒走罐頭裡面d 油啦。

西洋菜豬肺湯

今日去開菜檔想買西洋菜煲個湯，咁菜檔哥哥就話煲豬肺啦，又好喎，都好耐無整過囉。

材料：
豬肺一副
（最好叫豬肉檔幫手洗埋，否則番屋企洗到傻）
南北杏
果皮
瘦肉約$15～$20
紅蘿蔔一細條
無花果3粒

做法：
1. 先將豬肺切件，開白鑊（無油）燒到有微微白煙出，就倒入豬肺炒，一路炒一路會出水，炒到d 水太多，就要連豬肺倒晒出嚟，再開鑊，再炒，起碼炒5至6次，直至豬肺完全無水出為止。

2. 西洋菜洗淨，紅蘿蔔去皮切件，瘦肉出水，無花果一開二，果皮浸軟去囊。

3. 煲滾水，將所有材料煲2個鐘就可以。

Plateaux de fruits de mer de Paris

邊個話豪華宴一定會好貴架！ 係屋企，一樣整到出神入化，只要比小小心思，五星級豪宴就可以咁正啦！

水牛芝士蕃茄沙律
法式海鮮拼盤
美式芝士餅

迷人酒醉“黑森林”

幫朋友做左個蛋糕 ～ 黑森林。呢個look 我好滿意，自己都覺得好靚！ 亦好開心嘅係，佢地對個蛋糕都有讚，自己嘅滿足感又提升左不少！多謝！