Christmas cake

呢個聖誕假都好勤力下，整左2個大蛋糕，48個cupcakes. 都算係咁啦 當然最開心係朋友收到，自己都開心.

平安夜大餐

每年，最大project 就係平安夜聖誕大餐. 今年照舊同梁大廚合作，整左餐五星級大餐(我地覺得啫...haha). 好大滿足感!

Menu:
Greek salad
無花果脆片火腿多士
煎蟹餅
凍蝦
香草蠔油汁煮元貝
牛油香草焗雞
Seafood Bouillabaisse 伴香蔥蒜茸包
白酒青口
聖誕朱古力蛋糕

煲仔飯

星期日已經同屋企人做左冬，离日就簡簡單單整個煲仔飯食.

正所謂煲仔飯，除左要有飯焦外，真係要有煲仔味先得! 幾貴嘅煲都無用，一定要用番最傳統嘅沙煲先至會有果種獨特嘅煲味! 食落去d 飯都特別香架!

賀壽私房菜

昨晚同老友興祝生日，請埋佢父母一齊嚟開餐，大家識左幾十年，已經好熟啦.

昨晚8餸1湯，我都覺得自己好勁! 全場亮點就係黃金蝦同籠仔膏蟹蒸糯米飯，豉油雞就當然無得輸啦. 當然生日蛋糕更不在話下.......

大家都食得好盡慶，肚皮滿載而歸，哈哈哈！

Chocolate coffee mousse with cherry filing

蛋糕裝飾後，的確唔同晒!

Happy Birthday to my dear friend :)

籠仔膏蟹蒸糯米飯

上日見到朋友出街食飯，post 左張膏蟹糯米飯嘅相，真係有d 唔底得....哈哈哈！

唔難整呀，今晚自己整番轉，睇，唔錯架，絕對可以比美出面食架!

韓潮

自從韓劇熱爆香港，似乎連食市都有影響，點解? D 人睇完韓劇，紛紛都走去食炸雞，韓燒.........

离晚一班朋友幫老公補祝生日，就去左灣仔一間韓店食晚飯，唔算多人，地方都幾好坐，食物方面，我最鍾意燒牛仔肉，半熟烤魷魚同燒雞。

全晚亮點，當然係我親手做嘅香蕉朱古力蛋糕啦，靚晒!

香蕉合桃蛋糕

屋企幾隻蕉，擺下擺下，終於出晒斑點啦! 好野，可以整番個香蕉合桃蛋糕啦!

蕉夠熟，焗出嚟蛋糕香到無朋友呀!!

食譜 - 

材料：

香蕉2隻、檸檬汁、冧酒各2茶匙、玉桂粉少許（隨意）、無鹽牛油100克、鹽少許、黑糖60克、蛋黃2個、蛋白霜料：(蛋白2個、砂糖30克)、核桃60克、低筋麵粉150克、發粉、蘇打粉各1/2茶匙

預備：在模中鋪上牛油紙。牛油放在室溫中軟化。粉類過篩。核桃烤過後切成粗粒。預熱焗爐180度。

做法：

1.     將香蕉壓碎，淋上檸檬汁和冧酒。

2.     將牛油放入碗內，加入黑糖後用打蛋器打起。將蛋黃分2次加入並攪勻，將(1)香蕉加入去。

3.    把蛋白放入另一個碗，加少許鹽打至起白泡，分兩次把糖加入。打成挺身的蛋白霜。

4.    把篩好的粉類 : 一半份量加入2中並攪勻，將蛋白霜的一半加入並攪勻。再加入餘下的各種粉類，餘下的蛋白霜就分兩次加入，盡快攪勻，最後加入核桃碎。

5.    將糕糊倒入模中，用刮刀在中間劃一道痕跡，然後沿痕倒下少許植物油。形成油坑。先入爐焗了首10分鐘後，再在蛋糕中間切一道深痕。再焗多約35分鐘後, 熄火焗多5分鐘。焗完後脫模待涼。

 ** 其實開火焗的時間合共45分鐘, 熄火焗多5分鐘, 途中如果發現蛋糕已經好深色, 可以加塊錫紙在蛋糕面.

咸魚冬菇蒸肉餅

一碟咸魚冬菇蒸肉餅，你可以食幾多碗飯?

雖然唔多健康，但間唔中一餐，食唔死嘅 :)

大芥菜滾肉片湯

大芥菜膽唔係成日會見到，今日有緣同佢相遇，靚到咁，無理由唔帶番屋企囉。

切片厚薑，滾水落，加埋切左件嘅大芥菜膽，滾起，加入肉片同咸蛋，滾至所有才材料都煮透，加入粉絲，落鹽調味就可以啦. 有湯飲，有餸食，幾開心。

鹽麴 + 醬油麴

“鹽麴” & “醬油麴” 已經興爆日本，香港雖然都有得賣，不過細細樽都好貴. 而家試下自己整，睇下成唔成功先...... 8-10日後就知啦!

蕃茄煮飯

唔知咩原因，最近潮流興玩"蕃茄煮飯"，快靚正! 當然，我都要跟住潮流上啦，加小小變湊，落埋d 新鮮粟米粒 (原條粟米起粒)，煮出嚟都唔錯呀，又健康.

 

只要預備電飯煲，洗好米，水份比平日少1/3 左右，蕃茄洗淨，去頂位，放係米嘅中間，加幾粒海鹽，少少oliver oil, 煮熟攪均就食得啦!

隨你自己喜好, 加d 粟米，青豆..... 等等一齊煮都好味架.

 

明廚教室

最近參加左由Isaac 同KC 合作嘅明廚教學課程，地方係觀塘工廠大廈，有GOOGLE MAP 幫手, 唔難搵, 哈哈!

一個幾好舒適嘅地方，師傅教整燕窩饟雞翼，可惜每人只得一隻 (有D失望)，亦即場示範整蘿蔔糕，每人都可以攞一小盒走.  不過炆牛腩師傅已經一早整左，只係當場煮熱比我地食.

並不是好formal 嘅烹飪班，不過嚟見識吓，都ok 嘅.

嚌! 嚌! 嚌.......

又係時候去上下堂，學下點樣整個正正buttercream, 點樣好好利用嚌嘴，嚌出唔同創意嘅花.

睇，都唔弱架 !

家常便飯

呀哥番嚟探親，就佢今日等閒係屋企，整番幾個家常便飯同佢食. 佢係英國帶左個光波爐比我，港紙四百蚊咋. 今晚先試焗燒腩，效果幾好喎，塊皮好鬼脆. 仲有蒸鷹䱽; 豉汁魚雲; 籠仔蒸蟹; 炒白蜆; 白果腐竹糖水。 嘩.... 三條友飽到不得了!

大閘蟹

离日姪仔個朋友由上海帶左大閘蟹比佢，就係我呀娘家整嚟食. 嘩.... 不得了，一開蓋，d 蟹膏好兇狠吓，而且都好香，平時唔多食嘅呀媽都食左2隻. 無得輸，正!

飯桶朋友

离晚約左班朋友上嚟開餐，真係估佢地唔到，班女人食飯食得好兇狠，煮2 round 飯都唔多滿足佢地，笑死! 真係“飯桶” 朋友啦！

中秋月餅

絕對本地製造，不含地溝油或台灣製造豬油。

祝大家“中秋節快樂”!

新鮮海竹蝦

星期六, 係西貢見d 好靚海竹蝦，好生猛, 成枝筷子咁長, 呀叔話, 只係近中秋只有咁大隻海竹蝦, 可惜要番娘家食飯啦. 放棄買.

 

今日又再去睇,  又見有, 不過細少少, 呀叔話佢自己今晚做節, 大隻留番自己食, 無計啦, 咁我地都有買.

 

新鮮食材, 唔需要太多調味, 蒜茸牛油煎，加d 白酒，起碟, 加少許海鹽, 黑楜椒, 加多少少青檸汁, 已經好鮮味 !

 

 

玻璃曲奇

最近因為facebook, 聯絡番成二十多年無見嘅小學同學，真係好開心架!

 一個月前大家約埋聽日聚舊，想比D小小驚喜班同學仔，焗左玻璃曲奇，整埋小小包裝.....wow 不得不讚，太可愛啦! 無得唔鍾意啊！

 

Super gathering

呢排老友記因為屋企事都十分憂心，所以約埋我地幾位老友記上嚟我家聚一聚，食番餐，飲番杯，放鬆一下。

全場最好玩係大家一齊幫手做心太軟，笑話百出，出嚟靚仔之餘，都特別好食。

當然大家都可以盡慶而歸!

 

 

 

Sangria 食譜:

 

紅酒一枝 (平價就可以)

白蘭地 1/4 或 1/3 杯 

橙酒 1/4 杯

鮮橙汁 1/4杯

橙 1個 切粒

青蘋果 1個切粒

檸檬 1個切片

啤梨 半個切粒

 

糖水 : 1/3杯熱水 + 1/3 糖 (溶解糖份, 待涼)

 

(1) 將紅酒倒入大盤

(2) 加入所有切好生果加 入紅酒

(3) 加入橙汁

(4) 分2-3次加入糖水, 一面加, 一面試味, 不用太甜, 夠就可以停

(4) 同樣, 分2-3次加入酒類, 要一面加, 一面試味, 酒味濃度試到適合自己口味道亦可以停

(5) 放入雪櫃3小時以上就可以

 

**水果組合好隨意, 橙, 青蘋果, 檸檬為基楚, 可再配其他口味

 

** 橙酒:

 

- Triple Sec 橙酒中柑橘味最濃, 是調配Sangria 最好選擇, 可惜要酒窖才買到

- Cointreau 比較實惠, 一般烘培店都可以買到, 都會以酒辦形式出售

- Grand Marnier 製作中加入干邑白蘭地, 所以帶較強白蘭地氣味, 三種橙酒中最甜一種. 如果選擇這款, 糖水及白蘭地入量可再減輕.

 

月餅測試篇@廣式月餅

試埋廣式月餅，白蓮蓉單黃月餅，今年d 糖漿幾靚，焗左d 月餅色水好好，過左3日，回左油好滿意。

靚魚篇

今日無叫哥仔留魚，一早去魚檔睇吓有無好野，好采哥仔留起左d 好野比熟客. 上面張相就係啦， 牛屎，好豐富嘅魚油. 仲要留魚鱗蒸，先可以保留番d 魚油. 好鬼正!

至於下面張相，叫鐵鱗，可惜已比人留左. 哥仔話一年都無得幾多條食，如果見到一定要買啊!

月餅測試篇@酥皮奶皇月餅

好快就中秋啦，又係時間做定預習. 今轉係酥皮奶皇月餅，個樣幾靚仔，入口鬆脆，切開都無散開，合格. 奶皇今次減左糖份，雖然淡口左，都不失奶皇香. 整體嚟講，今轉測試 - pass !