五行湯

好想同大家分享呢個五行湯，好清甜。
五行湯可以增強身體免疫能力, 有癌症病人都會煲嚟飲，只係唔落肉。呢個湯就算日日飲，都唔會怕涼。

材料
五行包括 :
白蘿蔔苗及蘿蔔葉
粟米
紅蘿蔔
鮮牛蒡

瘦肉 或 西施骨

蜜棗 或 乾蕪花果

果皮

我自己做法:

由於菜湯唔需要煲太耐，但唔夠時間，骨類又出唔到味，我會先用西施骨煲1.5 小時，跟住再加入五行材料，蕪花果及果皮，煲1.5小時，熄火調味就可以飲用。

家常便飯

外甥仔聽日番澳洲，難得一聚，整餐好小小嘅家常便飯，大家傾吓，食吓，不之幾高興。

外甥仔一見到冬瓜盅，即問點解唔係冬天食咩？。。。。唉，呢d咪叫做鬼仔囉! 冬瓜冬天食，哈哈!

呢晚嘅亮點，當然係迷里冬瓜盅啦，可愛到呢。。。。

好耐都無整過泰式豬頸肉，仍然好好味!

今次蒸帶子粉絲，打破傳統，用蒜茸，冬陰功醬，少許雞湯，水， 煮粉絲先，放涼後，帶子一開二，放粉絲面蒸3分鐘就攪掂，幾得吓喎!

豬豬又嚟啦 (附食譜)

減壓最佳嘅方法， 莫過於食番餐好既，飲番杯靚酒，最緊要係 。。。有班損友陪伴左右 !陪你笑，陪你喊，夫復何求!

上星期六又約左老友記嚟焗豬豬, 第四次焗啦 , 今次最成功, 堅皮脆肉嫩!

濃蝦湯，真材實料! 油鹽焗蟹，掂! 老友記整嘅醉雞翼，正! 自家整嘅Sangria, 得! 你話。。。仲點會出去食呀！

原來飲醉左，仲整到心太軟，一定係傻架啦！

仲有老友記攞嚟嘅砵酒 , 襯埋喺英國買嘅酒杯仔, 靚到呢。。。。。

What a wonderful night! Thanks my dears!

話梅醉雞翼

天氣熱辣辣，凍食自然最受歡迎，用小小時間，整盒醉雞翼，放入雪櫃，幾時攞出嚟食都咁開心!

材料:
雞翼1至2磅
大量冰塊
月桂葉幾片
白楜椒粒一茶匙
蔥段(白色部份)幾段

汁料: (以下份量可因個人喜好而加減)

糟鹵 一支 (約500ml)

紹興酒 180ml

豉油雞汁 1湯匙 

雞湯或水3湯匙
魚露半湯匙
砂糖/黃糖半茶匙

話梅 6，7粒

杞子15-20粒  (洗淨用暖水浸軟)

 
做法:

開一鍋水，水滾後落月桂葉，白楜椒粒，蔥段雞翼，上鑊蓋直至水再次滾起，熄火，焗15分鐘，再開大火，再將水滾起多一次，再熄火，焗15分鐘，預備大量冰水，將雞翼放入冰水浸約10至15分鐘，隔水備用

將糟鹵，紹興酒，雞湯，豉油雞汁，杞子，話梅，魚露全部倒在一個碗內浸約10分鐘試味.

將雞翼放入汁料內，入雪櫃浸一晚就可以吃用

White Wine Grape Mousse Cake

快樂時光 ~ 預祝老友記生日，玩左小小新花臣，出左嚟嘅做型，我自己就好滿意啦! 你呢？

~ White Wine Grape Mousse Cake

🎉🎉Happy Birthday 老友記🍾🥂

靚靚蛋糕

每次老友記生日， 都會盡力做個獨一無二嘅蛋糕為佢地慶祝。今次估唔到，加上小小碎花，閃燈，成個look 都唔同晒!

Happy birthday 老友記!

貴精不貴多

朋友嚟飯局，決定又焗隻乳豬，因為得4個人，唔好整得太多野，朋友鐘意食蟹，就整個咖哩蟹，仲有雜菜沙律，加埋Sangria, 小小芝士頭盤，甜品嚟個清新嘅strawberry mousse 就已經大滿足啦！

忙碌過後，享受一下

工作忙完，又要忙屋企事。。。。。總要搵個位，停一停，放鬆一下! 簡單整個慢煮羊架 (56.5°C  2.5hrs) 配個印度白飯，飲番杯紅酒，那有得輸呢！

口水雞

今日心血來潮，想食口水雞，仲玩手撕果隻，不過今次雪得唔夠，下次雪凍d就更正。

食譜: 

http://rebekitchen.blogspot.hk/2015/11/blog-post.html

玩新野

呢2日整左唔同餸，都用煎米粉做底! 离日整薑蔥大蝦，d汁混埋d脆米粉，好好味! 今日就整冬陰功煮雞，好好味，不過d汁唔太配合煎米粉，配飯應該比較適合。

胡椒蟹

大年初三，老友記一家嚟拜年，實在街市唔多野賣，玩爐端燒就最好啦，好唔覺意地，竟然買到隻大肉蟹，整左胡椒蟹，好惹味，可以係街市買到呢種肉蟹，實在可遇不可求!

恭喜發財!

情人節

蒸糕之餘，今日情人節，幾簡單，都要整個蛋糕仔慶祝吓嘅，可能太趕，個蛋糕唔夠firm, 散散地。。。。。因為同老友記一齊慶祝，佢地夠義氣，完全唔介意，食晒! 呢d咪朋友囉! I love you all !

糕，糕，糕!

今年都算勁，10底蘿蔔糕，7底芋頭糕，4底馬蹄糕，簡直傻左! 好采蒸格可以兩層蒸咋，唔係。。。。都唔個蒸到幾時!

其實9成都係比屋企人，佢地食得開心，辛苦d都值。

蘿蔔糕@預習

又係到蒸糕時候啦，因為一年先整一次，都習慣預先整番轉，睇睇掂唔掂。 今年嘅第一蒸，還不錯喎，係上海街買嘅臘味，又真係幾得!

邪惡的。。。。。

天氣凍，突然好想食煲仔飯，反正上日入左好多臘味。。。。。就嚟呢煲邪惡煲仔飯啦！有臘腸，潤腸同臘鴨肶，仲唔邪惡。。。。哈哈哈!

快靚正 ~ 上湯大蝦燴伊麵

當你唔想攪咁多野，一碟攪掂晒，呢個上湯大蝦燴伊麵就方便不過啦，我家位相公，連最後一粒菇都食埋。

材料:
中蝦 或 龍蝦
翠玉瓜
野菌
(其實跟個人起好更改蔬菜)
蒜茸，紅蔥頭茸適量

湯料:
1份雞湯 + 1份水
少許鹽，砂糖，麻油，楜椒粉
粟粉水

做法:

1) 先將蝦洗乾淨，去腸，去腦，係蝦肚中間開一刀，用抹手紙印乾水份，加少許幼鹽，粟粉曬係蝦身，跟住就可以泡油，7，8成熟就可以起，隔油備用

2) 伊麵滾水焯一焯，隔水備用

3) 翠玉瓜切件，跟野菌用乾蔥茸蒜茸略炒

4) 用番原鑊，加入雞湯，水，調味，煮滾，加入伊麵，煮熟就先上碟，唔好煮太耐，過淋就唔好食

5) 用番鑊裡面嘅上湯，如果唔夠水份，就可以加番d雞湯及水，加入粟粉水，煮至略為小小結身，就落蝦煮一煮，跟住加埋瓜同菇，煮熱就可以連湯倒係伊麵上面。

*如果鐘意莞茜，可以最後加入

糯米飯

天氣凍，突然好想食糯米飯，用埋上次係上海街買嘅臘腸，太美好了!

好選擇!

天氣凍凍地，你會食咩? 打邊爐? 羊腩煲? 或者整番個雞煲亦是好選擇! 唔難整，仲可以買d豆苗，枝竹一齊食，簡直滋味啦！順便蒸碟靚馬友，點可以唔滿足呢！