泰式醉鮑魚

真係唔知道, 上水太湖虛街市D 野原來都好平, $5 一份有3大個節瓜, $7一份有幾個薯仔蕃茄.... 等等.  但比我搵到一檔, $108 有8大隻活鮑魚, 好底, 點都要買嚟試吓, 又係另一檔$40 買左半斤急凍中白蝦.  用嚟整醉鮑魚, 蝦就最好不過啦! 

 

整左出嚟, 鮑魚好得, 蝦就一般啦, 唔新鮮!

 

 

食譜:

1. 鮮鮑魚 / 其他海鮮
2. 糟滷 350G
3. 雞湯 300G
4. 清水50G
5. 香茅, 拍扁, 切條 (只要白色部份) 35G
6. 南薑, 切片 35G
7. 指天椒, 一開二  3-5隻
8. 檸檬葉 8G
9. 砂糖 2湯匙
10. 玫瑰露 OR 花雕 3湯匙

 

做法:

1. 將材料(2) - (9) 大火煮滾後, 轉細火煲5分鐘, 熄火, 待涼
2. 開一煲水保持至約大約80度, 將鮑魚煮熟
3. 倒起鮑魚, 去殼, 去腸, 放入冰水浸約10分鐘
4. 隔乾水, 就放入糟滷汁中, 加入玫瑰露或花雕, 放入雪櫃雪6小時以上就可以享用.

** 因各人口味唔同, 當煮糟滷汁時, 要一路煮, 一路調啱自己味道. 食完海鮮, 個汁可以留番整醉雞翼, 都好好味.

 

 

 

 

冬陰功海鮮南瓜湯

上星期睇"唔熟唔食"，見Jacky 教整呢個海鮮南瓜冬陰功湯，好似好好味咁，今晚自己又整番轉，嘩。。。真係好好味! 估唔到加左藩茄同南瓜嘅冬陰功可以咁出色，正!

冷麵

上日去AEON, 朋友介紹左隻鰹魚汁，加埋柚子醋，去整冷麵汁。我用左一份鰹魚汁，1/3 份清水，少許柚子醋，少許麻醬，整出嚟個汁好好味，當然要一路調，一路試味啦，調到啱自己口味就可以。

咖哩魚蛋

朋友幫我買左d 細細粒魚蛋，自己再買d 豬皮同蘿蔔，整左咖哩豬皮魚蛋蘿蔔，老公話可以開魚蛋檔啦，仲攞左成盒番公司食。哈哈，唔知可唔可以同譚小環爭吓生意呢。。。。。。

Piccolos

上星期六，本來唸住去澳門行吓，但朝早太大雨，結果取消左，兩條友，又去西貢啦！

去左間叫Piccolos, 見佢轉過好多次，就不如試試，叫左3樣野，招牌沙律，海鮮risotto, 青口，3樣都好好食，味道剛剛好，用嘅材料好新鮮，每樣食物睇得出有心機煮出嚟。讚!

糖醋骨

久違了的糖醋骨，我同老公都好鍾意食，酸酸甜甜，好開胃架!

只要把一字排洗淨, 用少許生抽, 老抽, 麻油, 砂糖, 粟粉醃一陣，預備糖醋汁:1/4 杯黑醋， 1/4 杯水，1/8杯生抽，1/8杯紹興酒或者玫瑰露，少許老抽，適量冰糖，加多一少塊片糖。另外預備一湯匙薑茸，一湯匙蒜茸。

燒熱鑊, 薑茸炒香後, 加入排骨炒至轉色，加入蒜茸炒大約一分鐘, 加入汁料, 水位最好高過排骨， 水滾上蓋, 用細火炆約45分鐘，跟住開大火收至汁料結身就可以。

中途可以試吓味, 唔夠醋味或甜味, 可以自行再加.

好味道呀。。。。。

好耐都無玩薑蔥炒蟹啦，今轉除左用基本野做獻汁，豉油，糖，老抽，麻油，蠔油，燒酒外，再加多左一大湯匙嘅油咖哩，嘩。。。。好野味啊！好味到停唔到手!

 

 

豉油雞

星期日整左電飯煲豉油雞，都好味，不過我個人喜歡明火煮，d 豉油味濃d , 汁結身d. 不過用電飯煲就方便囉。

起貨日。。。。

呢兩日好忙，要起蛋糕同macarons，忙，忙，忙。。。。。

先交個Batman 蛋糕，同埋muffins.  呢期Batman 蛋糕做型都好唔錯呀，襯埋muffins, 絕!

下就好努力做macarons, macarons 最慘係，唔係次次出嚟都ok, 時得時唔得，最終都攪掂晒。

檸檬撻

又係時候出去上吓堂，今次學整檸檬撻，睇吓人地有咩心得可以整到好脆口嘅撻皮，意大利馬令點先至打得好，蜜餞果皮點整，呢堂都學晒。 我好鍾意個檸檬醬，真係好fresh, 唔似出面甜多個酸，檸檬嗎, 一定要有番佢咁上下酸先似樣嘅。

粟米鬚煲水

今日又學左樣野，菜檔哥仔教，粟米鬚一斤，2條甘筍，十多粒馬蹄，加多3粒無花果，4公升水煲45分鐘，唔夠甜先加冰糖。當涼茶飲，清熱，利尿。更可放入雪櫃作凍飲。

魚檔掃場記

休魚期剛剛開始，本來都唔唸住有咩魚食，點知魚檔哥哥今早話留左魚比我，哈哈，當然要去掃掃場啦。

見圖，左上角係好靚嘅黃釘，少有; 細細隻墨魚仔，原隻白焯，伴辣椒豉油，d 墨都食得，仲可以降膽固醇喎; 肥美花蟹仔; 仲有買少見少嘅紅衫魚，呢幾條真係靚絕!

Chocolate Pudding 心太軟

"Chocolate Pudding ~ it's not a Dessert, it's a Perform" ~ from Gordon Ramsay. 

如果你有睇明珠台嘅Master Chef, 其中一次就係整心太軟，主持當時就同參賽者講左呢番說話，我100%應同!

食譜:

預備:
- 2隻直徑約3.5吋布丁焗杯，塗上牛油溶液，全隻杯裡面都要酒上朱古力粉

- 焗爐預熱210度

- 預備定2個雪糕球放入雪櫃備用

- 2隻平底碟

材料:
65% or 70%黑朱古力粒 63g
牛油 63g

雞蛋 2隻
幼砂糖 50g

低筋粉 30g (過篩)

Icing sugar 裝飾用

做法:
1. 朱古力 + 牛油隔水坐溶
2. 雞蛋 + 砂糖 用手動打蛋器打2分鐘
3. 將朱古力溶液加入蛋液攪均
4. 最後加入低粉攪均
5. 入爐焗8分鐘

出爐後，用薄刀沿住杯邊輕輕介開，反轉倒入平碟中，酒上icing sugar, 放上雪糕球，就可以享用。

溫馨提示 : 每個焗爐嘅爐溫都有出入，第一次未必會成功，要試試爐溫

老黃瓜素湯

天氣真係熱得可怕，個太陽好似要溶左你咁! 所以好早就出左去買餸，跟住都無出過街囉!

如果身體濕氣重，總係有好累感覺，買左個老黃瓜煲湯，清熱去濕。

材料: 老黃瓜，紅蘿蔔，粟米，白背黑木耳，合桃，腰果，紅棗，果皮

將所有材料水滾煲1.5 小時就夠。

另外買左泥孟，今次唔蒸，油鹽水浸，鮮甜好多架; 苦瓜今日都好靚，攞嚟炒排骨，頂瓜瓜!