糖醋骨

久違了的糖醋骨，我同老公都好鍾意食，酸酸甜甜，好開胃架!

只要把一字排洗淨, 用少許生抽, 老抽, 麻油, 砂糖, 粟粉醃一陣，預備糖醋汁:1/4 杯黑醋， 1/4 杯水，1/8杯生抽，1/8杯紹興酒或者玫瑰露，少許老抽，適量冰糖，加多一少塊片糖。另外預備一湯匙薑茸，一湯匙蒜茸。

燒熱鑊, 薑茸炒香後, 加入排骨炒至轉色，加入蒜茸炒大約一分鐘, 加入汁料, 水位最好高過排骨， 水滾上蓋, 用細火炆約45分鐘，跟住開大火收至汁料結身就可以。

中途可以試吓味, 唔夠醋味或甜味, 可以自行再加.