Last gathering in 2017

係2017 與好友最後一次開心派對，懶懶地，簡單幾味，志在食得開心，傾得高興!

佢地有食神，蝴蝶蛑唔係次次街市都有得賣，今次仲好肥好大隻； 另外果2隻爆膏野生膏蟹，真係貴得有道理；一年一轉嘅羊腩煲，仍然可以保持水準啦！話雖得三味餸，已飽到上腦了! 食番d生果同蛋花馬蹄露清清味蕾。

呢晚，大家都大滿足!

Happy New Year !

燒乳豬

話說呢隻急凍豬已經係冰格放左唔知幾多個世紀。。。。其實想掉左佢，老公話不如照焗左佢，睇吓點樣。當然，佢講得輕鬆啦，中間幾多步驟咪又係我整!

攪完一輪，終於出爐啦，今次係第2次焗豬，皮真係比上次脆，因為今次焗法有小小唔同，皮面搽左白醋同牛油，而焗爐溫度都提升左，出嚟效果都好好。

Merry Christmas !

預早賀聖誕

因為老友記聖誕要飛，所以大家預早慶祝聖誕。

由於時間關係，安排食物都盡量簡單一點。慢煮 (SV) 就會係首選。

呢晚亮點 ~ SV 鴨胸 (55°C ~1 hr) 及 SV西班牙豬鞍 (56°C ~ 3hrs)，肉質粉紅，味道有驚喜! 另外一樽Canberry, port & orange sauce, 配鴨胸同豬鞍一流!

而鮑魚同蝴蝶蛑蒸完就雪凍當冷盤食，扇貝仔用牛油焗，另外麥片蝦，大受歡迎!

初試蘋果批，合格但還要改進!

鳴謝老友記攝影效果，唔係賣相都無咁吸引🤣🤣

破紀錄。。。。

因為公司攪charity event, 搵左3位同事 幫忙整曲奇，當然包括我啦。 我真係未試過，一晚整100塊曲奇。。。。。自己都要讚!

Macarons

其實換左焗爐咁耐，都未試整過Macarons, 咁啱呀姪孫過嚟我家，佢點名話要食，咁點都要試吓個爐!

爐左3盤，都好靚仔，爐溫夾得好好! 以前細焗爐，每次整，都總有一盤唔得嘅!

又要對呢個焗爐再加分!

蛋黃酥

今年唔整月餅啦，整左咁多年，真係有d悶。

呢次玩蛋黃酥，上網搵左好多資料，睇左幾條youtube，終於試玩吓，出嚟效果又唔錯喎，酥皮面做到一層層，已經合格啦！

西班牙海鮮飯

成2年都無整過啦，最1同事話想整，叫我幫佢買西班牙米，咁買開。。。。緊係買份比自己啦。今次雖然無青口，但1用花甲都唔錯呀！我家位相公都不知幾喜歡!

咸魚雞粒蒸飯

幾經辛苦，同事幫手係長洲買到條馬友梅香，因為已經係買小見小啦!

馬友咸魚，真係好味到無朋友，擦左肉連蝦乾雞肶粒蒸飯，嘩。。。。簡直係上菜!

跟呀爺學野

呀爺廚藝無得頂，大家都十分應同! 最近就跟足呀爺食譜，整左避風塘豆豉炒蟹，仲有極之懷舊嘅芝麻卷。正!

好一餐家常便飯

其實懶左好耐，加埋天氣太熱，都唔想整太多，又唔知食咩好。

但今日突然想食芝士蝦焗飯，再清清地煮個金銀蛋浸絲瓜，蒸多條班仔，雖然整完都週身汗，總好過熱辣辣出去搵食嘅。

香蒜刁草欖油浸廣島蠔

參考過Jacky Yu 食譜，自己再加重少少份量，用埋澳門買嘅oliver oil, 效果好好，下次去開澳門都要入多d油啦。

呢個預先整定，可以放係雪櫃幾日，係做前菜嘅首選！

冬瓜盅

离晚老公請左幾位老朋友上嚟食飯，整左幾味家常便飯，當然亮點就係個冬瓜盅啦，而家係街食，好少有成個冬瓜出啦，只係一份冬瓜環就算，自己整，點都真材實料啦。

四川雞煲

出街食過四川雞煲，其實搵啱材料，自己整又有何難。。。。繼羊腩煲後，四川雞煲都唔駛出街食啦!

(食譜稍後登出)

京蔥炒蟹

好耐都無玩過薑蔥炒蟹，難得買到隻堅肉蟹，炒番餐食都唔錯呀！

專登買條京蔥切件，厚薑片數片，3粒乾蔥頭一開二。 汁料 : 半湯匙麻辣醬，一湯匙蠔油，半杯雞湯，少許胡椒粉，砂糖，麻油，粟粉攪均備用。

先將蟹切件，泡油至7，8成熟，隔油備用
燒熱鑊，落油，加入乾蔥頭，薑片，京蔥炒香，加入蟹件，灒酒，上蓋焗1分鐘
加入生抽，老抽炒均，倒入已開好汁料，快炒至結身，就可以上碟。

為老友記賀壽

上星期五，為老友記預祝生日，整左個朱古力蛋糕為佢賀壽，最開心係。。。一路都想搵隻雀仔做裝飾，果日竟然係花墟見到，即買! 放左係蛋糕面，的確唔同! 讚!

今次蛋糕加左隻spice chocolate powder, 可能brandy 亦加多左，混合左無咩spice 味，反而多左玉桂味，有趣!

American Cheese Cake

真係無唸到，呀朋友仔老公，自從食過我嘅cheese cake 念念不忘。朋友仔都試過買唔同品牌比佢食，佢都唔太鍾意!

今次應該係我幫佢做嘅第3個生日蛋糕，有人咁鍾情我嘅出品，實在開心!

Happy Birthday !!

Strawberry jam

上次整左樽果醬比朋友，佢好鍾意，叫我幫佢再整多幾樽比朋友。

离晚用左2100g士多啤梨，整左7細2大，無啦啦手痕，做左小小包裝，就攪成咁！太過份了！！

無得輸嘅壽宴

剛過去嘅星期六，幫老友記預祝入伍大壽，大家食得開心，玩得開心，13枝酒，醉了。。。。。。雖然辛苦小小，但超值！

老友記，生日快樂！

辣椒苗

第一次接觸辣椒苗，菜檔呀哥話好去濕，又易煲，只要將葉梗較粗身去掉，只要幼嫩部份，煲滾水，加舊薑，切片瘦肉，咸蛋，煲起再加埋d辣椒苗，煮熟就起得，快靚正！

最愛酸梅鴨

原來成年有多，都無整過酸梅鴨。。。。。今晚再次回味，嘩。。。。。一流，平日我都唔加飯，今晚實在底不住，要再加飯!

梅鴨材料:
·    鴨半隻 （原隻，不用切件）

汁料:
·    薑數片(厚切), 乾蔥兩，三粒切片
·    1.5湯匙柱侯醬
·    1.5湯匙麵豉醬
.     1湯匙花生醬 （可以唔加）
·    5~6粒酸梅壓溶
·    少許生抽及老抽
·    蒜茸兩湯匙
·    冰糖適量打碎(細粒狀)

做法:
1.   清洗鴨身, 吊乾水份
2.   鴨皮用老抽上色約15分鐘
3.   燒熱鑊, 加少許油, 放入鴨煎至金黃色備用
4.   再次燒熱鑊, 加少許油, 炒薑片, 乾蔥, 蒜茸, 炒至有香味, 加入汁料略炒, 放入鴨, 灒酒, 加熱水，大火滾起後，轉細火炆大約40分鐘, 其間要把鴨轉身, 以及要試味.
5.   煮好的鴨放涼切件, 把煮剩汁料煮至結身, 淋上鴨面.

(汁料因個人喜好而可加減)

Souffle

离晚去完金鐘某大酒店食buffet, 實在大失望，6百幾蚊，食物質素卻一般！

佢地整嘅souffle, 實在無可能攞出嚟比客人！賣相已經差，味道一般得很！

所以今日試整，雖則升得唔夠靚，但點都靚過酒店，味道亦十分好！ 等我再研究吓點先升得再靚仔d!

暖泣泣。。。。

終於感覺到冬天啦，繼离日打完邊爐，今晚就玩煲仔飯 ~ 冬菇，臘味，鮮雞，熱辣辣上枱，點會唔暖泣泣呀！

粒粒皆辛苦。。。。

學鼎爺整呢個生炒糯米飯，堅係生米炒成熟飯，玩成半粒鐘，真係炒到手仔軟，好采炒完出嚟都似模似樣。

一路炒，不其然地唸起細個，一到冬天，媽媽就一早起身炒呢個糯米飯比我地食。媽媽完全唔覺辛苦，只要大家食得開心，佢就開心！

簡單 。幸福

情人節一向都唔會出去食飯，又貴，質素又差! 倒不如簡單係屋企整餐食，已經感到好幸福!

情人節快樂!

薑蜜煎金蠔

朋友幫忙係流浮山買左肥大金蠔，之前睇電視，話金蠔先蒸後煎，效果會好d, 我將金蠔係冰格攞出嚟一陣，跟手隔水蒸左8分鐘，用kitchen paper 抹乾水份，洒小小粟粉，細火煎至金黃色上碟，跟住用一湯匙薑茸炒一陣，加入適量蜜糖，煮至結身就倒係金蠔面。唔用薑蜜，用黑醋都可以的

簡單團年飯

今年同家人提早做左節，所以今日得倆公婆自己食。 明知街市又多人，又貴，都係打開雪櫃，有咩食咩啦！澳洲M7和牛肉眼，唔失禮啦，再玩fusion d, 團年食埋碗湯圓，正到不得了！

最後一糕 ~ 芋頭糕

一早起身整埋呢4底芋頭糕，就可以收爐啦！

祝大家雞年行好運！步步高昇！身體健康！

雞年再見！

糕。糕。糕。。。馬蹄糕

今日公司收爐啦，原本唸住聽日放假先再蒸糕，但手痕痕，想即晚整一部份，聽日就可以休閒d.

今晚先嚟2底蘿蔔糕，2底馬蹄糕，聽日玩埋芋頭糕，就真係收爐啦！