梅菜扣肉

從來無唸過，梅菜扣肉要整咁長時間，到自己落手整，先知原來係心機菜。剩係蒸嘅時間都用左3個鐘。出嚟味道好野味，真係送飯一流，同埋一定要買靚嘅甜梅菜，唔係就嘥心機啦。

 

 

 

材料:

1.         五花腩一斤

2.         甜梅菜半斤

3.         薑3塊切厚身

4.         蒜頭兩粒切茸

5.         打碎冰糖3湯匙

6.         紹慶酒3湯匙

7.         老抽2湯匙

8.         麻油適量

9.         粟粉水適量

 

預備一盆冰水

 

做法:

1.         先將五花腩加入薑片飛水約5分鐘, 放入冰水中浸至完全涼透, 抺乾水份, 切片, 大約半吋厚一塊. 

2.         燒熱鑊, 加入少許油, 炒香梅菜後, 放入碗中, 加入蒜茸, 酒, 老抽 及冰糖攪均備用. 

3.         預備一個大碗, 把切片五花腩排入碗中間, 皮向碗底, 將已攪均梅菜放入碗的兩側及面, 完全蓋過豬肉. 

4.         包上兩層錫紙, 碗邊位置要壓實. 放上蒸架, 中火蒸3小時. 

5.         先開小許錫紙口, 倒出所有汁料後, 然後先斯走錫紙, 用一隻圓碟蓋住個碗, 跟住連碟連碗小心反轉, 慢慢打開個碗, 好靚嘅梅菜扣肉就差不多了. 

6.         用3-4湯匙汁料, 加入粟粉攪均, 煲滾剩餘汁料, 加入麻油, 粟粉水, 煮至結身, 倒上扣肉面, 完成. 

記住煮多幾碗飯啊!

 

又係燒味。。。。。

無錯，又係燒味，今日玩燒腩。离日已同豬肉檔留定塊靚嘅五花腩，順便買2塊厚切豬扒，條豬扒新鮮到，面果塊豬皮都仲未起，第一個切比我，好正! 五花腩唔駛講啦，第一次買到咁靚嘅肉。

 

食譜參考: http://irenechanwai.mysinablog.com/index.php?op=ViewArticle&articleId=112073

同場加映 ~ 煎釀2寶，上湯浸薯仔苗，蝦乾蝦醬炒飯。

 

 

Weekend 家常便飯

今晚奶奶過嚟食飯，佢口味比較淡，簡單整幾個家常便飯，啱晒口味。

先嚟"苦瓜粟米素湯"

兩個大苦瓜切大件, 粟米一條切件

半碗腰果 + 合桃, 2湯匙黃豆, 一起浸水10分鐘

白背黑木耳2-3朶浸水15分鐘, 切件

果皮一塊去囊

煲滾水, 把所有材料(除了黑木耳)加入, 先用中大火煲10分鐘, 再轉細火煲40分鐘, 加入黑木耳煲20分鐘, 加鹽調味.

蜜汁义燒

要買半肥瘦梅頭肉一斤, 用3湯匙义燒醬, 1湯匙柱侯醬, 1湯匙海鮮醬, 1湯匙冰梅醬, 2湯匙玫瑰露, 2湯匙薑汁及1湯匙黃砂糖醃半日或以上.

掃面糖槳, 用1湯匙冰糖, 加少許滾水攪溶, 加入5湯匙麥芽糖坐熱水待用

焗爐用230度先焗10分鐘, 反轉焗10分鐘, 掃上糖槳焗5分鐘, 再反轉掃上糖槳再焗5分鐘, 直至兩面都有少少燶面, 就可以. 放涼10分鐘以上先切件上碟.

 

蒸火點 (海魚嚟架) 

 

梅菜蒸茄子 (呢隻係台灣茄子, 型狀似細南瓜型, 好甜) 

 

 

甜品凍食"檸檬馬蹄露"

睇過"唔熟唔食" 介紹呢款甜品, 天熱食啱晒胃口, 我用番自己整開嘅食譜, 熄火加左3湯匙檸檬汁及半個檸檬皮茸, 煮好放涼, 入雪櫃, 幾時食都可以.

http://rebekitchen.blogspot.hk/2013/09/blog-post_9981.html

 

簡單晚餐

今晚夜左番，去左超市買左pack已醃好嘅牛仔骨，而屋企已經有沙律菜，啦啦聲洗埋，切好，煎埋牛仔骨，好快就上碟啦，快，靚，正!

今晚都有點兒過份。。。。但好滋味

本來今晚只係煲湯同炆牛臉肉，點知魚檔哥哥又鬼咁好，留左魚之外，仲有蟹同蜆，呢排d 花蟹仔同蜆最肥，下個月就無咁肥美啦，所以。。。。及時行食! 哈哈

我都知兩條友咁食都有d 過份，但真係好滋味啊！

響螺花膠雞腳湯
紅酒洋蔥炆牛臉肉
金不換炒蜆
籠仔蒸蟹
清蒸海魚

薑汁撞奶

去完食早餐，係屋企無無聊，就玩薑汁撞奶。

材料:
老薑/泥薑一舊，去皮磨薑汁，大約要2~3湯匙
砂糖 22g
鮮奶一小盒

做法:

1. 將磨好薑汁倒入碗中
2. 奶同糖煮熱至80度，用小匙羹攪拌碗中薑汁，將熱奶即刻倒入碗中，靜止大約10分鐘

有blog友 話要用高奶度嘅奶，比較容易凝固。我用老薑係鐘意薑味夠辣，糖份多少隨個人喜好而加減。

我今次凝固未係好firm. 下次再放耐d.

好肥。。。。不過好好食

係759用六十幾蚊買左包9大粒嘅凡立貝，整左呢個 " 凡立貝芝士燴伊麵 "，雖然有點點罪惡感，因為裡面好多牛油同芝士，不過真係好食，算啦，食多兩餐燕麥啦，嘩卡卡!

食譜參考: http://bonnie.chiba78.com/articles-20559.html

星期二晚餐

好似好耐都無食過苦瓜炒蛋，前兩日買餸，就叫菜檔哥哥執隻靚苦瓜我炒蛋，佢即時就教我點整最好食 :

苦瓜洗完切件，開大火燒熱鑊，落油，轉中火，倒入苦瓜平均放係鑊面，唔好攪佢，煎大約一分半鐘，就反轉佢又煎，當見到苦瓜邊有少許金黃色，再開大火，加油，落蛋轉中火，煎至兩面金黃色就ok. 

我整完，其實同我平時煎嘅差唔多啫，哈哈!

我用左一個大苦瓜切件，4隻蛋+2隻蛋份量嘅雞湯+蔥粒打均，咁樣d 蛋煎出嚟唔會咁實。煎苦瓜時，我都會加小許鹽同糖出出味。

同場加映牛肉粒炒芥蘭，牛肉粒只係街市買，平平地，但牛味都好濃，好味!

星級私房菜

又再嚟"星級私房菜"為老友記預早慶祝生日，离晚辛苦晒梁大廚整左餐超美味嘅"西班牙fusion 菜"! 梁大廚，Well done!

我就整左個"Amaretto Cheesecake"賀老友記生日，簡單配搭，靚 *^O^*

Happy Birthday Candy!

海鮮餐。。。。

今日去魚檔哥哥到，佢留左好多野比我，䱽魚，蜆同蟹，幾醒!

藍花蟹好好肉地，清蒸啖啖肉，蜆都好肥美, 蒸埋條䱽魚, 好滿足啦。

**********

油鹽水粉絲煮蜆

清蒸藍花蟹

豉汁蒸䱽魚

 

油鹽水浸蜆食譜:

材料:

1. 蜆一斤
2. 粉絲一細包, 用水浸軟
3. 冬菜一湯匙, 用水清洗
4. 薑兩片
5. 鹽一菜匙
6. 砂糖, 楜椒粉, 油各少許

做法:

1.  先將蜆清洗乾淨
2. 開鑊加水煲至滾起, 加入蜆, 熄火, 略炒約30秒, 再倒回篩中, 隔水備用(目的係洗去沙粒及污垢)
3. 再開鑊加水煲至滾起（水位只要剛蓋過蜆就可以）, 加入鹽, 冬菜, 薑片, 少許生油, 少許砂糖及楜椒粉, 再倒入蜆, 煮至差不多開殼, 再加入粉絲, 煮至所有蜆都開殼就可以熄火上碟.　可加入少許蔥段.

(以上材料可以跟個人口味而加減)





鮮果忌廉蛋糕

今晚好開心，一家人同老爸慶祝80歲生日，由於老爸身體唔係太好，今年留係屋企食，辛苦晒二嫂同老媽兩位大廚，我當然負責蛋糕果part 啦，鮮果忌廉蛋糕，最基本，佢地最鍾意。