2015 最後一擊

呢個會係今年最後一擊 - Mango Cream Cake! 呢個order 係整比一位85歲嘅嫲嫲! 嫲嫲見到蛋糕十分驚喜! 呢個就係我嘅期望啦! 希望未來日子，繼續可以帶比身邊所有人有無限嘅驚喜啦!

遲來的聖誕派對

終於等到啦........聖誕派對，其實每年都係24號攪，但今年某d 原因，改到去今日先玩.

仍然好開心，同班閨中密友傾吓，食吓，笑吓，唔覺唔覺又過12點啦！

Duck confit

想試好耐啦，隻鴨肶都買左好耐!

今次用76.7° SV 12 小時. 效果好得。

我可以話佢係鬼佬油鴨肶。

Merry Christmas ~ Christmas eve dinner

好多年都未試過2個人過平安夜，都係唸住簡單地整餐食，點知.....都一樣攪成日，係咪自己老左，手腳慢左呢.......

Merry Christmas! 祝願大家幸福快樂!

大焗爐

上星期終於到左我嘅大焗爐啦.....好采舊時個位剛剛放得入! 同佢始終比較陌生，要d 時間培養下感情.

先焗左乳鴿，色水都唔錯. 再嚟焗cookies, 時間方面可以再調整下，不過都好ok!

壽宴

好朋友生日，緊要整餐好野佢食啦，仲加埋個靚靚蛋糕，開心到痺!

是日晚餐
紅蝦刺身伴沙律菜
慢煮香草羊架
煎魚柳伴蕃茄沙律
白酒青口

Chocolate & mango mousse

大滿足!

烚吓烚吓!

天氣涼涼地，有咩好得過係屋企打邊爐咁自在呀！想食咩，就買咩。 出面打次邊爐，食好少少都要五六百銀......

一早叫左魚檔哥仔留魚打邊爐，佢搵左條赤立幫我起埋肉，超正! 啖啖肉，又滑口。 自已再買多少少野，食完都攬住個肚啦!

芝士焗大蝦焗飯

上日同班朋友係三聖村興起食過芝士大蝦焗飯，真係一試難忘.......擔粗粗自己整番轉, 哈.......雖然仲未食番果種味道，但都唔太差，我家相公仲話好好食 (因為佢未食過興記囉)。 哈哈哈…...不過下次煮多d汁會更好!

羊腩煲

已經2年無炆過羊腩煲, 舊年D冰鮮羊腩都唔知點解貴得咁兇狠! 買果兩. 三斤要成3舊幾水, 仲未計買其他材料! 出去食好過!

今年試買D 急凍澳洲羊腩, 都幾好嘅, 不過始終唔及鮮羊腩果種肉質好. 呢刻只求過下隱, 平平地, 整住先, 食住先啦.

 

M&M`s 蛋糕?

係......朱古力蛋糕底，面層倒上m&m 同用朱古力棒圍邊，有邊個小朋友唔鍾意架! 開心死! 不過食完要刷多幾次牙啦 !

壽宴

离晚老公大壽，本來都唸住出去食，但大家又鍾意飲酒，辛苦d就辛苦d啦，係屋企整餐豪宴，嘩.....算係咁啦，我都要比自己100分! 再加埋上左8個幾鐘嘅糖花班整呢個花花裝飾，仲要加多100分呀！哈哈哈.........

嘩.....好多糖呀！

姪孫B雖然過左生日，但小朋友生日會總係開唔停. 生日正日係迪士尼攪，係果度訂埋蛋糕，因為有“咪咪”陪切餅........

今日幾位小朋友一齊攪生日派對，mo 媽一早已經叫我整餅，只要最簡單嘅海綿蛋糕. 由最平凡嘅.......整到佢不平凡，做最軟熟嘅海綿蛋糕，配上法式馬零整嘅buttercream, 掂! 加埋好colourful 嘅jelly beans 做裝飾........係細路見到都like 爆!

今年第一餐 ~ 大閘蟹

老友話想食番餐大閘蟹，都好呀. 反正今年未食過.

离晚幾樣餸都係第一次整，好得，無失禮，全靠老友記教路.

最簡單而又最好食，非紅豆煎餅莫屬! 

菜單:

• 大閘蟹
• 無骨口水雞
• 話梅醉鴨舌
• 海蜇頭
• 烤麩
• 豆沙煎餅

*************

 

 

無骨口水雞

 

材料:

• 新鮮雞1隻 (去頸去腳) (全隻約3斤重)
• 炒香之花生及芝麻各少許
• 芫茜碎少許
• 薑片數片
• 蔥2棵切段
• 八角2粒
• 皮蛋1隻 (切粒)粉皮適量 (用熱水煮至透明, 過冷河, 隔水備用)
• 大量冰塊

 

慢煮方法 (Sous Vide) : 將雞洗淨, 吊乾. 用少許海鹽搽均雞身(裡外), 雞肚放入薑, 蔥, 八角. 放入SV 袋做真空處理. 用水溫66度, 浸雞4.5小時.  
電飯煲焗法: 將雞洗淨, 吊乾. 用少許海鹽搽均雞身(裡外), 雞肚放入薑, 蔥, 八角 放入電飯煲煮, 直至煮熟.
不論用什麼方法整熟隻雞, 之後係雖要加入冰水直至雞身完全冷凍, 這樣可以令肉質更有彈性. 之後就可以起骨切件, 或者手撕, 或者原隻暫件都可以. 



麻辣汁材料 (以下份量可因個人喜好而加減) :

• 生抽3湯匙
• 鹽 1/4湯匙
• 鎮江醋5湯匙
• 麻油2湯匙
• 砂糖4湯匙
• 辣椒油約 1 1/2湯匙
• 麻醬或花生醬 1 1/2湯匙
• 花椒粉少許
• 花椒油 1 湯匙
• 蒜茸，蔥茸各 3/4湯匙 

 

把所有材料攪均就可以. 將雞肉放入碟內, 粉皮可圍著雞肉或放於底層, 上面放上皮蛋粒, 將汁料淋上雞肉面, 酒上芝麻, 花生及莞茜即成.

*************

話梅醉鴨舌


材料:
鴨舌 1磅
大量冰塊

汁料: (以下份量可因個人喜好而加減)

• 糟鹵 一支 (約500ml)
• 紹興酒 180ml
• 豉油雞汁 1湯匙 
• 雞湯 3湯匙
• 話梅 4粒
• 花椒 15粒
• 杞子15粒  (洗淨)

 

做法:

1. 開一鍋水，水滾後落鴨舌煮5分鐘, 沖水, 再放入一大盆冰水浸約10分鐘, 隔水備用.
2. 將糟鹵，紹興酒，雞湯，豉油雞汁，杞子，花椒 ，話梅全部倒在一個碗內浸約10分鐘試味.
3. 將鴨舌放入汁料內，入雪櫃浸一晚就可以吃用.

 

 

 

麥片蝦

呀嫂去完星加坡，買左包整蝦嘅麥片比我試下。

做法好簡單:

先將蝦洗淨，挑腸，中間開一刀，印乾加少許粟粉去炮油。

中細火開鑊，加入牛油，乾蔥茸炒香，加入2隻子天椒，1湯匙咖哩醬略炒，倒入蝦，加少許海鹽，黑楜椒碎炒均，倒入麥片，熄火炒均就可以上碟。

如果你地去開星加坡，呢樣都係唔錯嘅手信啊!

中秋日

中秋節快樂!

离日已經係娘家BBQ做左節，今晚就同奶奶，叫埋老友上嚟做節。 朝早去街市實在太多人，好采叫魚檔哥哥留左黃腳同針墨，再買d 少少野就走人。過時過節，買餸都特別貴，簡單幾味就算啦。

另外我地買左個有機 “碌柚”，老板娘話西柚同碌柚混種，味道清甜。好容易開，塊皮好軟身，可惜唔夠水份，味道還可以，咁特別嘅食物，試過就算啦!

傳統 vs 摩登

我食月餅，都係鍾意傳統味道，鍾意傳統月餅有種獨特嘅香味，唔食得多，一兩件都總要有。 所以今年雖然生產量唔多，但都會有蓮蓉月，五仁以及豆沙月。

奶皇食法唔同，都好食，不過似食曲奇感覺。 我有幸總有2位小粉絲，每年都會專登整比佢地食。

奶皇月餅整起時當然脆口，不過隔左日就會無咁脆，皆因奶皇餡本身水份重，始終會令個皮容易“林” 身。 建議用焗爐160度焗5~6分鐘，放涼一陣，脆口就會番嚟啦。 切勿用微波爐，個皮只會越焗越“林”。

又嚟月餅啦

本來今年唔唸住整，不過老公想要，就小量生產啦!

4粒鐘起左30個，包括伍仁，白蓮蓉及豆沙. 等陣要包好5盒比老公送比人.

而家個樣都幾靚仔，過多3日，回一回油仲靚呀！

過兩日整埋奶皇，今年就收爐啦！

韓式嚌花 ~ 中班

上完初班，終於到中班啦，搵左另一間學，因為上日果間，老師態度真麻麻......

今次呢位老師以前都跟過，好有耐心教. 呢5粒幾鐘，不停手咁練習，結果......大家睇到啦. 似模似樣架!

比枝斧頭搶晒鏡

專登訂左枝斧頭扒啦老友記開餐. SV 54°c 3hrs. 起初都有d 頭痕. 邊有咁高咁大嘅煲架....... 結果，老公最醒. 用升盤SV 佢，原全無問題啦！

攪掂後，每面煎約2分鐘，再用火槍燒下枝骨位，上碟. 你都睇到啦，佢點會唔搶晒鏡呀.

同場加映

紅菜頭蘋果沙律
香橙甘筍帶子凍湯
白汁青口
白酒水蜜桃伴雪糕

白酒水蜜桃伴雪糕（4人分量）

材料：
白酒 400克
砂糖 75克
水蜜桃（開邊） 2個
檸檬皮 1個
Vanilla Ice Cream

做法：
1.將白酒與砂糖放入小鍋內，開大火煮至剩下一半分量。
2.把開邊水蜜桃分別放入密實袋內。在密實袋內各注入白酒糖水。跟着再放入檸檬皮。
3.把密實袋慢慢地放入清水內，讓水壓自然地將袋內的空氣逼出之後，將密實袋封口。
4.將包裝好的水蜜桃放入 80℃的熱水內浸煮 20分鐘。
5.撈起浸熟的水蜜桃，放入冰水內10分鐘至完全冷卻。放入雪櫃冷凍數小時或過夜。
6.從袋中倒出水蜜桃，用手撕去外皮，切件後上碟，伴雪糕享用。

************************************

香橙甘筍帶子凍湯 (4人分量）

材料:
去皮甘筍 600克
清水 600克
牛油 60克
鹽 8克
橙汁 600克
帶子適量

做法：
1.用去皮器將甘筍刨成薄片。
2.將甘筍片、清水、牛油及鹽放入小鍋內。
3.開大火煮滾後，蓋上鍋蓋，轉用小火煮15分鐘。
4.把煮好的甘筍片先連放進攪拌器打成蓉, 再加入橙汁一起打1分鐘, 將湯放入雪櫃冷凍。
5.將帶子煎至金黃色, 放入湯碟中間, 再加入凍湯即成。

 

雪糕粒粒紅豆冰

老公今日係街市買左包紅豆，台灣出，檔口老闆話好易淋好易煮，但結果唔多係喎...... 不過最終都整到粒粒紅豆冰，幾好味呀!

材料: (2杯)

紅豆180g

紅豆水 50g
糖90g

椰奶50ml
淡奶25ml

雪糕(任何口味，可選擇)2球

碎冰

做法:
1. 將紅豆浸水放入冰格一晚，第2日連冰水煮30分鐘，熄火，焗15分鐘，試下夠唔夠淋身，唔夠可以再加時間煮。

2. 將紅豆水與紅豆分隔，用50g 紅豆水加入砂糖微微煮熱直至糖溶化。 放涼備用。

3. 將椰奶及淡奶混合。

4. 先放入紅豆粒入杯中，再加入紅豆糖水，只要剛剛蓋住紅豆粒就好，加入冰粒，倒入椰奶混合物，最後放上雪糕。

Wild mushroom risotto

繼离晚整過risotto後，心痕今晚又整，買左幾款唔同茹類，再用埋牛乾菌一齊煮起個risotto, 放埋隻溫泉蛋，攪掂!

Fine dinning

突然醒起老公上日去完澳洲番嚟，帶左意大利米同松露油番嚟都未試。
 

朝早就去買左急凍帶子，野菌，用埋我買左好耐嘅牛乾菌，分別整左帶子野菌意大利飯，上碟後加入黑松露油，超香; 仲有磨菇湯，再上埋cream burlee, 大滿足啦。

Cream burlee 食譜 (4杯中size)

材料:
忌廉 ---  150g
牛奶 ---  150g
糖 ---  38g
蛋黃 ---   3 隻
雲呢拿油 --- 1/4 茶匙 

做法:
(1) 忌廉加蛋黃拌勻
(2) 牛奶加糖煮至溶
(3) 將熱奶倒回拌勻的忌廉中, 再加入雲呢拿油拌勻
(4) 用隔篩將以上材料倒入焗杯中
(5) 預備焗盤，放入4隻焗杯，焗盤中加入水至焗杯一半位置
(6) 放入焗爐，以150度火焗30 分鐘
(7) 放涼後，可放入雪櫃雪凍
(5) 食前，將沙糖倒在蛋面, 用火熗燒焦糖粒, 製作焦糖面。

韓式嚌花

上網見到，最近大熱嘅韓式嚌花好靚，我鍾意玩嚌花多過做糖花，就報左初班啦。 誰不知，原來好高難度，技巧絕對唔容易掌握，好不容易先整到咁嘅樣，呢份功課，都係得60分咋。 真係要實習多d 啦.

保身良藥

呢排身體有小問題，係屋企休息，所以呢排都無咩post. 放心啦，而家精神幾好，下星期一番工。

今日，呀哥朋友送左2箱紅酒嚟，24枝.... 都幾驚嚇! 不過好開心! 剛開左澳洲果隻試，唔錯架，好香，薄身d, 果味都重，易入口，呢隻老公都會鍾意!

久違了....... Macaron

小小姪孫B, 幼兒班畢業，佢媽媽叫我幫忙整macaron 送比老師，當係thank you gift.

离晚一番去就開擅，始終覺得要換焗爐，太細啦，要分5轉先整到成50粒macaron.  都算幾好啦，加埋幫佢整埋張thank you card, 都夠殺食啦!